Праваабаронца «Вясны», былы палітвязень Леанід Судаленка атрымаў на сваё імя ліст з ад кіраўніка кабінэта прэзыдэнта Францыі Эманюэля Макрона:
«Прэзыдэнт Рэспублікі даручыў мне адказаць на ваш ліст.
Запэўніваем вас, што ваш запыт прыняты да ведама, пра што я паведаміў міністру Эўропы і замежных спраў. Прашу прыняць найлепшыя пажаданьні, Радрыг Фурсі».
У канцы чэрвеня з нагоды адкрыцьця ў Парыжы выставы, прысьвечанай Алесю Бяляцкаму, Леанід Судаленка накіраваў прэзыдэнту Эманюэлю Макрону ліст з прапановай правесьці зь беларускімі ўладамі перамовы аб вызваленьні з турмы самага вядомага беларускага палітвязьня.
«Заклікаю Вас выкарыстаць свой палітычны аўтарытэт на міжнароднай арэне, уступіўшы ў дыялёг зь недэмакратычным урадам Беларусі ў пытаньні вызваленьня з турмы праваабаронцы і ляўрэата Нобэлеўскай прэміі міру Алеся Бяляцкага», — напісаў у звароце да Макрона праваабаронца Судаленка.
Судаленка: зроблены толькі першыя крокі
Леанід Судаленка ў інтэрвію Свабодзе гэтак ацаніў адказ з Парыжу:
«Раней я казаў, што мне паведамілі пра атрыманьне майго ліста з канцылярыі Макрона. Цяпер адтуль прыйшоў адказ, зь якога вынікае, што мая прапанова вывучаецца ў Міністэрстве Эўропы і замежных спраў Францыі. Гэтым прамежкавым вынікам я задаволены, бо ўжо вызначаны пэўны шлях па рэалізацыі маёй ініцыятывы. Спадзяюся, яе рух на гэтым ня спыніцца, зроблены толькі першыя крокі», — мяркуе Леанід Судаленка.
Беларускі праваабаронца працягвае настойваць, што трэба мяняць стратэгію барацьбы за вызваленьне палітвязьняў.
«Мяркую, ад патрабаваньня „вызваляйце ўсіх разам“ лепш пакуль адмовіцца, бо ў сёньняшніх умовах гэтае патрабаваньне не выглядае рэалістычным. А вось вырваць з рук сыстэмы некаторых палітвязьняў, якія апынуліся ў дрэнным становішчы, — такое ўяўляецца магчымым.
Пацьвярджэньне — тое, што на на пачатку месяца адбылося з Рыгорам Кастусёвым, яшчэ зь некаторымі палітвязьнямі, якія ўсё ж выйшлі на волю. Таму шанцы дамагчыся вызваленьня Алеся Бяляцкага мне здаюцца таксама рэальнымі. Ён самы вядомы беларускі палітвязень, Нобэлеўскі ляўрэат. Для любой краіны гэта гонар — мець такога чалавека, і мяркую, можна пераканаць кіраўніцтва ў Беларусі, што вызваленьне Алеся Бяляцкага будзе на карысьць усім. Што да мяне, я з такімі аргумэнтамі гатовы і далей грукацца ва ўсе дзьверы — і буду гэта рабіць», — кажа Леанід Судаленка.
Паводле праваабаронцаў «Вясны» стан здароўя Алеся Бяляцкага апошнім часам пагоршыўся. Камунікацыя зь Бяляцкім абмежаваная, сьцьвярджаюць у «Вясьне».
Хто такі Алесь Бяляцкі
Беларускі праваабаронца, грамадзкі дзеяч, літаратуразнаўца. Заснавальнік і кіраўнік праваабарончага цэнтру «Вясна», палітычны зьняволены.
- Нарадзіўся 25 верасьня 1962 году ў гарадзкім пасёлку Вя́ртсіля ў Карэльскай АССР, дзе ў той час працавалі ягоныя бацькі-беларусы. У 1965 годзе сям’я вярнулася ў Беларусь, у Сьветлагорск.
- У 1984 годзе Алесь скончыў гісторыка-філялягічны факультэт Гомельскага ўнівэрсытэту, працаваў настаўнікам у Лельчыцкім раёне.
- Служыў у савецкім войску ў Сьвярдлоўскай вобласьці РФ мэханікам-кіроўцам браняванага цягача.
- У 1986–1989 гадах быў заснавальнікам Аб’яднаньня маладых літаратараў «Тутэйшыя».
- У 1989 годзе скончыў асьпірантуру Інстытуту літаратуры Акадэміі навук Беларусі.
- З 1989 да 1998 году працаваў дырэктарам Літаратурнага музэю Максіма Багдановіча.
- У 1991–1996 гадах быў дэпутатам Менскага гарадзкога савету дэпутатаў.
- У 1996 годзе заснаваў праваабарончую арганізацыю «Вясна»
- 4 жніўня 2011 году быў затрыманы — яго абвінавацілі «ва ўхіленьні ад выплаты падаткаў». 23 лістапада асуджаны на 4,5 года пазбаўленьня волі ў калёніі ўзмоцненага рэжыму з канфіскацыяй маёмасьці.
- У 2012 годзе ў Бібліятэцы Радыё Свабода выйшла кніга Валера Каліноўскага «Справа Бяляцкага».
- 21 чэрвеня 2014 году быў датэрмінова вызвалены з Бабруйскай калёніі.
- За 25 гадоў сваёй дзейнасьці быў адзначаны шматлікімі прэміямі і ўзнагародамі: швэдзкай прэміяй імя Пэра Ангера, прэміяй Свабоды імя Андрэя Сахарава, прэміяй Homo Homіnі, якую ўручаў Вацлаў Гавэл, прэміяй Нарвэскага зьвязу пісьменьнікаў «За свабоду слова», прэміяй Дзярждэпартамэнту ЗША, прэміяй Леха Валэнсы, прэміяй імя Пэтры Кэлі, прэміяй Вацлава Гавэла ад ПАРЭ, прэміяй «За правы чалавека і вяршэнства закону» ды іншымі.
- Пяць разоў вылучаўся на Нобэлеўскую прэмію міру.
- Алесь — аўтар кніг «Прабежкі па беразе Жэнэўскага возера», «Асьвечаныя Беларушчынай», «Халоднае крыло радзімы», «Іртутнае срэбра жыцьця», «Бой з сабой», «Турэмныя сшыткі» (Менск, 2018, «Вясна»).
- 14 ліпеня 2021 году быў затрыманы паводле крымінальнага абвінавачаньня, у яго дома і ў офісе «Вясны» адбыліся ператрусы.
- Усяго за актыўную грамадзкую і праваабарончую дзейнасьць прыцягваўся да судовай адказнасьці больш за 20 разоў. Прызнаны палітычным зьняволеным.
- 7 кастрычініка 2022 году Алесю Бяляцкаму прысудзілі Нобэлеўскую прэмію міру.
- 3 сакавіка 2023 году Бяляцкага пакаралі 10 гадамі пазбаўленьня волі. Яго асудзілі разам з калегамі: праваабаронцамі Валянцінам Стэфановічам і Ўладзімерам Лабковічам.
- З моманту арышту ў ліпені 2021 году Бяляцкі мае вельмі абмежаваныя зносіны з сваёй сямʼёй, адвакатам і навакольным сьветам.
- Адбывае пакараньне ў папраўчай калёніі нумар 9 у Горках.
Форум