На мяжы зь Беларусьсю ў Жытомірскай вобласьці зьявіліся новыя білборды, на якіх Сілы абароны Ўкраіны папярэджваюць беларускіх памежнікаў і грамадзян Беларусі аб наступствах у выпадку іхнага далучэньня да Расеі ў вайне супраць Украіны.
На білбордах, якія разьмясьцілі на ўкраінскім баку закрытага кантрольна-прапускнога пункту, па-расейску напісана: «С рашистами вместе будешь грузом 200». Здымкі апублікаваў украінскі вайсковы карэспандэнт Андрэй Цапліенка.
Раней сьпікер Дзяржаўнай памежнай службы Ўкраіны Андрэй Дземчанка паведамляў Свабодзе, што такія акцыі Сілы абароны Ўкраіны пачалі ажыцьцяўляць у адказ на інфармацыйна-псыхалягічныя апэрацыі беларускіх памежнікаў.
Паводле яго, такія апэрацыі пачаліся пасьля таго, як Дзяржаўны памежны камітэт Беларусі ачоліў Канстанцін Моластаў, які атрымліваў адукацыю ў розных установах ФСБ Расеі.
