Кіраўніца Эўрапейскай камісіі Ўрзуля фон дэр Ляен заявіла, што папярэднія высновы аб выкананьні Ўкраінай «дарожнай мапы» для пачатку перамоў аб уступленьні ў Эўразьвяз будуць падрыхтаваныя ў чэрвені.
«Украіна няспынна і нястомна працуе над гэтымі сямю крокамі, нягледзячы на цяжкасьці ў ажыцьцяўленьні рэформаў у самы разгар вайны, і я хачу выказаць глыбокую падзяку за гэтую працу», — сказала Ўрзуля фон дэр Ляен.
Паводле яе, у чэрвені будзе зробленая вусная справаздача аб прагрэсе Ўкраіны на шляху эўрапейскай інтэграцыі, а ў кастрычніку — пісьмовая, на падставе якой і будзе ўхвальвацца рашэньне аб пачатку перамоў аб уступе ў Эўрапейскі зьвяз.
У сваю чаргу прэзыдэнт Украіны Ўладзімір Зяленскі заявіў, што ўкраінскі бок разьлічвае на станоўчую папярэднюю ацэнку ўжо ў чэрвені.
«Мы сапраўды вельмі на гэта разьлічваем. Прыйшоў час для станоўчага рашэньня аб пачатку перамоў пра сяброўства Ўкраіны ў Эўразьвязе», — сказаў ён.
Паводле Ўладзіміра Зяленскага, «каштоўнасьці, дабрабыт і мір на кантынэнце могуць рэалізавацца на 100 адсоткаў для Эўропы толькі разам з Украінай».
Што будзе ў 11-м пакеце санкцый супраць Расеі
Прэзыдэнтка Эўракамісіі дадала, што ў 11-м пакеце санкцый супраць Расеі плянуецца ўвесьці забарону на імпарт новых тэхналёгій і запчастак для самалётаў, а таксама ўзмацніць адказнасьць за абыход санкцый.
«Мы працягваем рабіць усё залежнае ад нас, каб спыніць ваенную машыну Пуціна. Нашы санкцыі працуюць. Напрыклад, мы зьменшылі наш імпарт з Расеі прыблізна на дзьве траціны. Гэта вялізны ўдар па даходах Расеі. Мы ўжо прымусілі Крэмль заплаціць высокую цану дзякуючы 10 пакетам санкцый. Эўракамісія зацьвердзіла прапановы для 11-га пакета, які будзе сканцэнтраваны на недапушчэньні абыходу абмежаваньняў. Мы працуем у гэтым пытаньні з партнэрамі, у тым ліку краінамі G7», — паведаміла Ўрзуля фон дэр Ляен.
Эўрапейскі парлямэнт на пасяджэньні 19 красавіка ўхваліў рэзалюцыю, у якой рэкамэндаваў да канца 2023 году пачаць з Малдовай перамовы аб яе далучэньні да Эўразьвязу.
Летась у чэрвені краіны Эўразьвязу ўхвалілі рашэньне аб наданьні Малдове і Ўкраіне статус кандыдатаў на ўступленьне ў арганізацыю. Гэтыя дзьве краіны падалі адначасова заяўкі па атрыманьне такога статусу, аднак Малдова апярэдзіла Ўкраіну з рэкамэндацыяй пачатку перамоў.
З таго моманту кіраўніцтва Ўкраіны настойвала, каб перамовы аб уступленьні ў Эўразьвяз пачаліся да канца 2023 году. Аднак пакуль такога рашэньня няма.
Ад Украіны Эўразьвяз патрабуе сем найважнейшых рэформаў: правесьці зьмены ў Канстытуцыйным судзе, давесьці да канца судовую рэформу, узмацніць барацьбу з карупцыяй, забясьпечыць барацьбу з адмываньнем грошай, прыняць антыалігархічны закон, прыняць закон аб мэдыя і зьмяніць заканадаўства аб нацыянальных меншасьцях. Калі гэтыя патрабаваньні ня будуць выкананыя, то Ўкраіна можа страціць статус кандыдата.
