Тэкст на расейскай мове апублікаваны ў выданьні «Медуза».
Сярод падпісантаў — танцор Міхаіл Барышнікаў, пісьменьніца Джоан Роўлінг, нобэлеўскія ляўрэаты па літаратуры Архан Памук, Герта Мюлер, Вольга Такарчук, Сьвятлана Алексіевіч, Марыё Варгас Льёса і Джон Кутзее, мастак Арт Шпігельман, драматург Том Стопард, актор Жан Рэно, рэжысэр Джэй Джэй Абрамс, былы духоўны кіраўнік Англіканскай царквы Роўэн Уільямс, журналістка Эн Эплбаўм.
«Навальны адбывае турэмнае зьняволеньне па абвінавачаньнях, якія ніколі не былі б прынятыя ніводным незалежным справядлівым судом, — гаворыцца ў звароце. — Мы падтрымліваем заклік ураду Нямеччыны, уладаў ЗША і Эўразьвязу, якія патрабуюць яго неадкладнага вызваленьня. Гэта ў Вашых сілах».
У звароце адзначаецца, што падпісанты далучаюцца да патрабаваньняў 600 расейскіх дактароў, 100 расейскіх адвакатаў і 100 рэгіянальных дэпутатаў, якія патрабавалі спыніць катаваньні апазыцыянэра. Адзначаецца, што палітыка зноў і зноў адпраўляюць у штрафны ізалятар — у тэксьце ён названы «адзіночнай камэрай, бэтонным кубам памерам з сабачую будку».
Навальнага затрымалі, арыштавалі і адправілі ў калёнію на пачатку 2021 году, калі ён вярнуўся ў Расею зь лячэньня і рэабілітацыі ў Нямеччыне. Ён асуджаны па некалькіх крымінальных справах, цяпер рыхтуецца суд па абвінавачаньні яго ў экстрэмізьме. Сьледчы, які вядзе яго справу, папярэдзіў, што Навальнага будуць судзіць за арганізацыю тэрарыстычнай супольнасьці.
Паплечнікі апазыцыянэра, шматлікія праваабарончыя і палітычныя арганізацыі ўпэўненыя, што яго судзяць за супрацьстаяньне ўладзе. Крэмль гэта адмаўляе і заяўляе, што ня ўмешваецца ў крымінальныя справы.
- Сёньня Эўрапейскі Зьвяз выказаў занепакоенасьць станам здароўя беларускага палітыка Віктара Бабарыкі, якога, як паведамляецца, шпіталізавалі са сьлядамі зьбіцьця.
- Таксама з заявамі наконт сытуацыі зь Віктарам Бабарыкам выказаліся МЗС Нямеччыны і Польшчы, а таксама амбасадар ЗША пры АБСЭ.
Перасьлед Віктара Бабарыкі. Што важна ведаць
- Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
- У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
- 22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
- Віктар Бабарыка віны не прызнае.
Хроніка перасьледу
- 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
- 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
- Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
- 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
- 12 чэрвеня Лукашэнка заявіў, што Бабарыка таксама датычны да справы, маўляў, «гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
- Фігурантамі «справы „Белгазпрамбанку“» сталі каля 20 чалавек.
- 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
- 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
- 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
- Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
- 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
- Штаб Бабарыкі падрыхтаваў да здачы 435 тысяч подпісаў.
- 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
- 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
- 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
- 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
- 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
- 6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
- 12 ліпеня стала вядома, што Бабарыку этапавалі ў ПК №1 у г. Наваполацак.
- 12 кастрычніка з ізалятараў выйшлі некалькі чалавек, затрыманых у справе «Белгазпрамбанку». Ім зьмянілі меру стрыманьня, але іншыя падрабязнасьці справы невядомыя.
- У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.
