Кіраўнік абласной ваеннай адміністрацыі Алег Сінягубаў паведаміў, што адна з ракет трапіла ў жылы дом у цэнтры горада, другая — у будынак мясцовай ВНУ, ён атрымаў сур’ёзныя разбурэньні. Выданьне «Суспiльне» піша, што пад удар трапіў Харкаўскі нацыянальны ўнівэрсытэт гарадзкой гаспадаркі імя А. М. Бекетава.
Мэр Харкава Ігар Церахаў удакладніў, што, паводле папярэдніх зьвестак, абстрэл вёўся ракетамі С-300. Ён таксама паведаміў, што «вядома пра пажар у адным з жылых дамоў».
Паводле Алега Сінягубава, у выніку сённяшніх ракетных удараў па цэнтры Харкава пацярпелі 5 мірных жыхароў. У прыватнасьці, раненьне атрымаў ахоўнік ВНУ, яму надалі мэдыцынскую дапамогу на месцы. Яшчэ 4 чалавекі пацярпелі ў выніку трапляньня ракеты каля жылых дамоў: 54-гадовая жанчына і трое мужчын 51, 55 і 58 гадоў. Цяпер мэдыкі надаюць ім неабходную дапамогу.
Адзін з жылых дамоў, побач зь якім патрапіла ракета, атрымаў сур'ёзныя пашкоджаньні. Выратавальныя працы на месцы працягваюцца.
