Усьмешкі, эмоцыі, малітвы: тысячы хасідаў сабраліся ва ўкраінскай Умані нягледзячы на вайну

03 кастрычнік 2024, 15:23

Радыё Свабода

Ва ўкраінскі горад Умань, што ў Чаркаскай вобласьці, нягледзячы на разьвязаную Расеяй вайну, зьехаліся тысячы паломнікаў-хасідаў, каб сустрэць тут сьвята Рош га-Шана (Рошашóнэ) — габрэйскі Новы год.

У Чаркаскай вобласьці ў сувязі з гэтым узмацнілі захады бясьпекі. У горад таксама прыехала група ізраільскіх паліцыянтаў.

У горадзе Умань пахаваны рабі Нахман — заснавальнік брацлаўскага хасідызму. Ён жыў у Кіеўскай губэрні, а незадоўга да сьмерці пасяліўся ў Умані. Магіла рабі Нахмана стала месцам паломніцтва.

Габрэі з гэтай плыні хасідызму лічаць за абавязак хаця б раз у жыцьці наведаць магілу Нахмана і вераць, што Новы год, калі яго сустрэць менавіта ў Умані, абавязкова будзе для іх шчасьлівым.

Сёлета габрэйскі Новы год надыходзіць 3 кастрычніка. Паколькі габрэі адзначаюць усе сьвяты на заходзе сонца напярэдадні ўрачыстасьці, то Рош га-Шана сустракаюць зь вечара 2 кастрычніка да вечара 4 кастрычніка. Гэты новы год будзе 5785-ым.

Паказаць яшчэ Паказаць менш

1 Хлопчыкі-хасіды з традыцыйнымі пэйсамі радасна пасьміхаюцца, пазуючы для фота. Імаверна, яны ў Умані ўпершыню. Верасень 2024 году.

2 Сталы паломнік знаёміцца з навакольлем. За ім ідуць іншыя хасіды, якія толькі што прыбылі ва ўкраінскі горад, каб сустрэць тут Новы год.

3 Калі заканчваюцца малітвы, паломнікі весела бавяць час – на вуліцах Умані яны танцуюць.

4 Паломнік пазуе для фота.

5 На галовах і ў руках маладых хасідаў — тфілін, чорныя скураныя куфэрачкі для пэргамэнту з тэкстамі Торы. У гэтых тэкстах, якія служаць асноваю габрэйскай веры, ёсьць наказ накладаць тфілін. Адзін куфэрачак накладаюць на галаву, другі на руку ў часе ранішняй малітвы.

6 Яшчэ адзін малады паломнік-хасід, які пагадзіўся, каб яго сфатаграфавалі.

7 Паломніцы-хасідкі тым часам рыхтуюць сваё часовае жыльлё ў Умані да сьвята.

8 Хасіды камунікабэльныя і адкрытыя людзі.

9 Традцыйна апранутыя маладыя хлопцы-хасіды занятыя сваімі тэлефонамі.

10 Хасіды напярэдадні Рош га-Шана, Умань, 30 верасьня 2024 году.

11 Яшчэ адзін мужчына з задавальненьнем пазуе для фота.

12 Адпачынак пасьля заканчэньня малітваў, верасень 2024.

13 Гэты паломнік апрануты цалкам сучасна, але абавязкова мусіць быць таліт — прастакутная накідка з чатырма кутасамі на ражках, якую накідваюць на галаву ў знак пакоры перад Богам.