Аляксандар Лукашэнка выдаў указ нумар 462 ад 30 сьнежня «Аб бюджэтным фінансаваньні», які амаль цалкам складаецца з пунктаў «для службовага карыстаньня», заўважыла Reform.by.
Дакумэнт афіцыйна апублікаваны на Нацыянальным прававым інтэрнэт-партале 7 студзеня, ён уносіць зьмены ў раней выдадзеныя ўказы, аднак іх пералік засакрэчаны — амаль ва ўсіх пунктах стаіць подпіс «для службовага карыстаньня».
З апублікаванага дакумэнту можна толькі даведацца, што зьмены ўнесьлі таксама ва ўказ № 93 ад 14 сакавіка 2022 году «Аб дадатковых мерах па забесьпячэньні стабільнага функцыянаваньня эканомікі», але і яны таксама засакрэчаныя. Не засакрэчана толькі тое, што з тэксту выключаецца назва ўказу «Аб садзейнічаньні разьвіцьцю экспарту тавараў (работ, паслуг)».
Указ набыў моц пасьля яго падпісаньня, вынікае з тэксту дакумэнту.
