Кіраўнік Дзяржаўнай памежнай службы Ўкраіны Сяргей Дэйнэка заявіў, што расейскія падразьдзелы, сфармаваныя з мабілізаваных, праходзяць падрыхтоўку пераважна на палігонах у Віцебскай вобласьці Беларусі.
«Паводле нашай інфармацыі, цягам наступных двух тыдняў частку расейскіх вайскоўцаў перакінуць на тэрыторыю Расеі з далейшым іх накіраваньнем у зону баявых дзеяньняў на наш украінскі Данбас. Ім на замену прышлюць частку вайскоўцаў з трэцяга армейскага корпусу шостай мотастралковай дывізіі», — паведаміў Сяргей Дэйнэка ў эфіры ўсеўкраінскага тэлемаратону #UAРазом.
Паводле яго, цяпер на тэрыторыі Беларусі, пераважна на палігонах у Віцебскай вобласьці, праходзяць навучаньне да 10 500 расейскіх вайскоўцаў.
«Мы бачым, што тэрыторыя Беларусі цяпер выкарыстоўваецца, менавіта яе вайсковая інфраструктура, для баявога зладжваньня расейскіх акупацыйных войскаў. Вядома, ворага нельга недаацэньваць. Калі вы запытаеце, ці ёсьць пагроза, вядома, яна ёсьць, але сказаць, што яна цяпер рэальная і крытычная, я не магу», — дадаў кіраўнік Дзяржаўнай памежнай службы Ўкраіны.
«Мы разумеем, што, так званая саюзная дзяржава, якая дае зь першага дня вайны ўсю дапамогу дзяржаве-агрэсарцы — інфраструктуру, паветраную прастору, свае базы падрыхтоўкі, у любы момант можа даць дапамогу і ў выглядзе спрыяньня паўторнаму нападу на тэрыторыю нашай дзяржавы. Аднак на сёньня мы не фіксуем стварэньня наступальных груповак на тэрыторыі Рэспублікі Беларусь», — удакладніў Сяргей Дэйнэка.
«Калі яны гатовыя на другую паразу, тады можна пачаць яго [наступ] заўтра, напрыклад, але дастатковых сіл для гэтага ў іх няма і, паводле маіх ацэнак, у студзені наўрад ці яны, войска аб’яднанай саюзнай дзяржавы, будуць здольныя на тое, каб спрабаваць ажыцьцявіць паўторны наступ на тэрыторыю нашай дзяржавы», — перакананы кіраўнік Дзяржаўнай памежнай службы Ўкраіны Сяргей Дэйнэка.
Камандуючы групоўкай сіл і сродкаў абароны Кіева генэрал-лейтэнант Аляксандар Паўлюк у эфіры тэлемаратону паведаміў, што створаная для абароны сталіцы групоўка здольная спыніць наступ.
«Кіеўская вобласьць дастакова моцна падрыхтавалася да магчымага новага наступу. Гэта некалькі рубяжоў вакол Кіева агульнай працягласьцю каля 1000 кілямэтраў, дзе на падмурку фартыфікацыйных пазыцый доўгатэрміновых абарончых збудаваньняў створана магутная сыстэма абароны, і так проста прайсьці будзе немагчыма», — адзначыў Аляксандар Паўлюк.
Паводле яго, цяпер уся мяжа зь Беларусьсю — гэта «суцэльныя завалы і мінныя палі».
«Да таго ж па іх сплянаваны агонь артылерыі, праца ад снайпэрскіх груп да мабільных вагнявых груп. Мы не плянуем прапусьціць іх далей мяжы», — падкрэсьліў камандуючы групоўкай сіл і сродкаў абароны Кіева.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
