Сьвяткаваньне Новага году па-за домам у Беларусі будзе спалучана з шэрагам абмежаваньняў і пройдзе пад пільным наглядам міліцыі, вынікае з камэнтара начальніка галоўнага ўпраўленьня аховы правапарадку і прафіляктыкі МУС Аляксандра Купчэні, піша BPN.
«Для павышэньня ўзроўню бясьпекі сьвяточныя пляцоўкі будуць абсьледаваныя сапэрна-піратэхнічнымі групамі, — заявіў Купчэня. — Грамадзяне змогуць прайсьці на ахоўную тэрыторыю толькі пасьля надгляду на спэцыяльна абсталяваных кантрольна-прапускных пунктах. Пры гэтым асобаў у стане алькагольнага ап’яненьня або тых, хто мае забароненыя для праносу прадметы, не прапусьцяць».
Паводле міліцэйскага начальніка, у «асобных месцах правядзеньня масавых мерапрыемстваў» будзе «абмежаваны дарожны рух і зьмененыя маршруты». Патрульныя нарады плянуюць «наблізіць» да забаўляльных установаў, павялічыцца і іх колькасьць.
Прадстаўнік МУС папрасіў паведамляць міліцыянтам у горадзе або па тэлефоне 102 пра «безгаспадарныя прадметы, падазроных грамадзян або выяўленыя правапарушэньні».
«Пераканаўчая просьба з разуменьнем паставіцца да павышаных мераў бясьпекі і выконваць устаноўлены парадак правядзеньня масавых мерапрыемстваў», — заклікаў Купчэня.
Летась беларусы сустрэлі новы год «партызанскімі» салютамі ў 23:34 — на знак салідарнасьці з тымі, што прайшоў праз рэпрэсіі за ўдзел у пратэстах. Дзе-нідзе салютавалі пад воклічы «Жыве Беларусь!».
Сымбалічны час 23:34 замест поўначы — гэта згадка пра сумнавядомы «народны артыкул» 23.34 КаАП (цяпер арт.24.23) «Парушэньне парадку арганізацыі або правядзеньня масавых мерапрыемстваў», па якім пасьля выбараў былі асуджаныя тысячы беларусаў.
