«Аляксей прыехаў ва Ўкраіну ў 2015 годзе. Прычым у Беларусі ў яго была добрая праца. Ён усё кінуў, бо, як сам казаў, ня мог больш жыць у тым маразьме. Спачатку далучыўся да Добраахвотніцкага ўкраінскага корпусу. Потым да створанай тактычнай групы „Беларусь“. Увосень 2016 году мы заехалі ў Мар’інку (горад каля Данецку, дзе з 2014 году цягнуліся працяглыя баі. — РС), стаялі там пяць месяцаў. „Якуб“ быў нацыянальна сьвядомы, ён быў праціўнікам беларускага рэжыму зь вельмі сталымі поглядамі. Ён лічыў, што няма іншага шляху супраць рэжыму, як рэальны супраціў. І нам, беларусам, нічога не засталося, як рыхтавацца, набіраць досьвед. Што ён і рабіў», — распавёў Вадзім Кабанчук.
Паводле Кабанчука, Аляксей у 2016 годзе заключыў кантракт з Узброенымі сіламі Ўкраіны і да 2022 году служыў у войску. «Ягонае падразьдзяленьне дзейнічала на розных кірунках. Зразумела, у 2016 годзе і пазьней гэта былі Данецкі і Луганскі кірункі. У 2022 годзе Аляксей у складзе УСУ служыў спачатку на паўночным кірунку, потым на данецкім. Пад Лісічанскам падчас жорсткіх баёў ягонае падразьдзяленьне трапіла ў паўакружэньне. Але яны пасьпяхова выйшлі адтуль. Аляксей не баяўся гарачых пунктаў і ехаў туды, куды пашлюць», — кажа Вадзім Кабанчук.
Кабанчук таксама расказвае, што меў кантакт з Аляксеем, калі той знаходзіўся пад Бахмутам. Менавіта там цяпер працягваюцца самыя жорсткія баі. Ён характарызуе «Якуба» як адказнага, адукаванага чалавека, зь якім можна было размаўляць на розныя тэмы. Вадзім Кабанчук пацьвярджае, што «Якуб» меў дзяржаўныя ўзнагароды ад Украіны.
«Ён быў добры баец, ён дакладна выконваў усе задачы, у яго не было аніякіх праблем з дысцыплінай. Аляксей мне запомніўся толькі са станоўчага боку. У яго была такая асаблівасьць, што ён не хацеў лезьці ў нейкае кіраўніцтва, хоць меў да гэтага і здольнасьці, і досьвед. Аляксей служыў і добра выконваў абавязкі», — дадаў намесьнік камандзіра палку Кастуся Каліноўскага.
Дзе і калі будзе пахаваны Аляксей «Якуб», пакуль невядома.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
