Дакумэнт, які прадставіў міністар фінансаў Юры Селіверстаў, уносіць зьмены ў Падатковы кодэкс і іншыя нарматыўныя акты. У прыватнасьці, з 2023 году законапраект прапануе:
- скасаваньне шэрагу падатковых ільготаў;
- індэксацыя ставак зямельнага, экалягічнага падатку, падаходнага падатку зь фізычных асобаў у фіксаваных сумах для адаптацыі іх да інфляцыйных працэсаў;
- павелічэньне ставак падатку на прыбытак для юрыдычных асобаў з 18 да 20 працэнтаў і падаходнага падатку з даходаў індывідуальных прадпрымальнікаў з 16 да 20 працэнтаў;
- для індывідуальных прадпрымальнікаў, згодна з праектам зьменаў у Падатковы кодэкс, плянуюць падняць падаходны падатак з 16 да 20%.
Таксама з Падатковага кодэксу хочуць выключыць пэўныя віды дзейнасьці, у якіх ІП могуць працаваць з адзіным падаткам. Як паведамляецца, таксама прадугледжана карэкцыя ставак адзінага падатку для індывідуальных прадпрымальнікаў у 1,5–3 раза, а для самазанятага насельніцтва — у 1,5–2,5 раза.
Раней міністар эканомікі Аляксандар Чарвякоў называў новыя магчымыя памеры падаходнага падатку пры такім варыянце працы ІП. З 2023 году плянуюць цалкам скасаваць спрошчанае падаткаабкладаньне для індывідуальных прадпрымальнікаў.
Як асноўны падатковы рэжым зьбіраюцца выкарыстоўваць падаходны падатак з павелічэньнем яго стаўкі з 16 да 20%, а з 2024 году — да 25%. Міністар анансаваў раней, што ўлады хочуць таксама скараціць пералік відаў дзейнасьці з выплатай адзінага падатку і павялічыць яго стаўкі ў паўтара-тры разы. Адначасова для мікраарганізацыяў захоўваецца магчымасьць выкарыстаньня спрошчанай сыстэмы падаткаабкладаньня: 6 працэнтаў ад выручкі.
