Лінкі ўнівэрсальнага доступу

 
Сахашчык аб расейцах у Беларусі і «ціхай мабілізацыі» Лукашэнкі»: «Ствараюць групоўку для чарговага этапу агрэсіі супраць Украіны»

Сахашчык аб расейцах у Беларусі і «ціхай мабілізацыі» Лукашэнкі»: «Ствараюць групоўку для чарговага этапу агрэсіі супраць Украіны»


Расейскія вайскоўцы, якія ўваходзяць у склад рэгіянальнай групоўкі войскаў ў Беларусі. 20 кастрычніка 2022 году
Расейскія вайскоўцы, якія ўваходзяць у склад рэгіянальнай групоўкі войскаў ў Беларусі. 20 кастрычніка 2022 году

«Я маю інфармацыю, што злучэньні Сілаў спэцыяльных апэрацыяў Беларусі ўжо даўкамплектоўваюцца да штатуваеннага часу», — кажа Валер Сахашчык.

У Беларусі ідзе стварэньне ўдарнай групоўкі для чарговага этапу агрэсіі супраць Украіны, лічыць сябра Аб’яднанага пераходнага кабінэту Сьвятланы Ціханоўскай у пытаньнях абароны і нацыянальнай бясьпекі Валер Сахашчык:

«Цалкам імаверна, што можа быць нанесены ўдар. І я б, напэўна, выказаў думку, што гэты ўдар будзе нанесены ў кірунку Берасьце — Львоў, каб адрэзаць Украіну ад шляхоў камунікацыі для дастаўкі вайскова-тэхнічнай маёмасьці. Гэта, напэўна, крыху палегчыла б задачу Расеі працягваць агрэсію», — такую думку выказаў Сахашчык у інтэрвію «Настоящему времени», адказваючы на пытаньне аб магчымых мэтах збору сіл Расеі і Беларусі.

Інфармацыю аб пачатку «прыхаванай мабілізацыі» ў Беларусі Сахашчык камэнтуе так:

«Насамрэч усе, хто гэтым цікавіцца, ужо разумеюць, што ідзе адмабілізаваньне для даўкамплектаваньня частак, злучэньняў. Але я маю інфармацыю, што злучэньні Сілаў спэцыяльных апэрацыяў Беларусі ўжо даўкамплектоўваюцца да штату ваеннага часу. Цяпер сытуацыя крыху падобная да таго, што было ў позьнім Савецкім Саюзе, калі ў тэлевізары праўды не гаварылі зусім, можна было пра нешта здагадацца паміж радкоў, а часта гаварыліся дыямэтральна супрацьлеглыя рэальнасьці рэчы. Таму я не зьвяртаю ўвагі на камэнтары афіцыйных асобаў, а супастаўляю факты, аналізую і раблю нейкія высновы».

«Гэта ня нейкія кароткатэрміновыя зборы, а цалкам сабе захады, якія праводзяцца, як правіла, з мэтай выкананьня нейкіх сурʼёзных задачаў», — кажа Валер Сахашчык.

Сахашчык лічыць, што сёньня кіраўніцтва Беларусі трапіла ў вельмі сурʼёзную залежнасьць ад Расеі, перш за ўсё фінансавую, бо адзіная крыніца даходаў зараз — «гэта расейскія траншы і расейская фінансавая дапамога».

«Увогуле гэта, называючы рэчы сваімі імёнамі, можна цалкам ацаніць як продаж дзяржавы замежнай дзяржаве, выкананьне аплачаных паслуг. Вельмі падобна, што Беларусь будзе ў той ці іншай ролі ўсё ж такі ўдзельнічаць у наступным вітку агрэсіі супраць Украіны, на жаль».

Зь яго словаў, у цяперашняй сытуацыі цалкам магчымая вэрсія падрыхтоўкі ўдару з тэрыторыі Беларусі ва Ўкраіну.

«Я б аддаў большы прыярытэт вэрсіі падрыхтоўкі ўдару з тэрыторыі Беларусі ва Ўкраіну. Ня думаю, што гэта для адбіцьця контратакі. У Чарнігаўскай вобласьці, якая прымыкае да Беларусі, і ў Кіеўскай вобласьці ніякага ўдару не рыхтуецца».

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
  • 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
  • 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
  • З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
  • У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
  • 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава
XS
SM
MD
LG