«Толькі рэальныя перамогі Ўкраіны, толькі рэальная абарона сябе свабодным сьветам ад расейскага тэрору і шантажу — абарона санкцыямі, абарона дапамогай Украіне — толькі поўнае выцясьненьне акупантаў з украінскай зямлі і дэмантаж агрэсіўных магчымасьцяў дзяржавы-тэрарыста — усё гэта шлях да міру. Мір стане магчымым тады, калі для Расеі стане немагчымым яе тэрор», — сказаў ён у сваім відэазвароце.
Прэзыдэнт Украіны гаварыў аб «актыўных дзеяньнях» на розных участках фронту.
«Вельмі складаная сытуацыя захоўваецца ў Данецкай вобласьці і Луганскай вобласьці. Найбольш складаным, як і ў папярэднія дні, застаецца Бахмуцкі кірунак. Мы ўтрымліваем свае пазыцыі. Увогуле, на ўсходзе і поўдні мы робім усё, каб акупанты адчувалі, што ў іх няма пэрспэктывы. Каго б яны ні пашлі супраць нас ваяваць, гэта скончыцца для іх толькі паразай», — сказаў Зяленскі.
Генштаб Узброеных сіл Украіны паведаміў, што ўкраінскія вайскоўцы адбілі атакі войскаў РФ каля 11 населеных пунктаў на Краматорскім, Бахмуцкім і Аўдзееўскім кірунках.
14 кастрычніка брытанская выведка заявіла, што Расея працягвае наступ у цэнтральнай частцы Данбаса і прасоўваецца «вельмі павольна». Выведка мяркуе, што Масква можа разглядаць захоп Бахмута як перадумову для прасоўваньня ў раён Краматорска і Славянска, які зьяўляецца найбольш значнай часткай кантраляванай Украінай Данецкай вобласьці.
