Міністарка фінансаў ЗША Джанэт Елен заявіла, што рашэньне групы OPEC+ аб скарачэньні здабычы нафты было «некарысным і неразумным» для сусьветнай эканомікі, асабліва для краін, якія разьвіваюцца. Яе словы прыводзіць газэта Financial Times.
«Мы вельмі занепакоеныя краінамі, якія разьвіваюцца, і праблемамі, зь якімі яны сутыкаюцца», — сказала Елен у інтэрвію газэце.
Яна таксама раскрытыкавала саюзьнікаў за тое, што яны павольна накіроўваюць Украіне фінансавую дапамогу.
«Тэмпы пераводу грошай ва Ўкраіну занадта павольныя», — дадала Елен, адзначыўшы, што некаторыя краіны, якія абяцалі дапамогу, нават не пасьпелі яе выдзеліць.
Рашэньне OPEC аб скарачэньні здабычы нафты на 2 мільёны барэляў у суткі, пачынаючы зь лістапада, можа прывесьці да скачку цэнаў.
Падобны крок — найбуйнейшае скарачэньне здабычы нафты ад пачатку пандэміі COVID-19. Асноўнае скарачэньне, як чакаецца, будзе праведзена за кошт Саудаўскай Арабіі і Расеі.
