Увечары 31 ліпеня па ўсёй Украіне была абвешчана паветраная трывога ў чаканьні запуску ракет з Чорнага мора. Да сярэдзіны ночы 1 жніўня расейцы тэрарызавалі абстрэламі Мікалаеўшчыну, Крывароскі раён у Днепрапятроўскай вобласьці, Запароскую і Харкаўскую вобласьці.
У Харкаўскай вобласьці загінулі двое жыхароў
На Харкаўшчыне расейскія войскі стала абстрэльваюць з артылерыі і авіяцыі тры раёны – Ізюмскі, Богадухаўскі і Чугуеўскі. У самім Харкаве расейскія снарады пацэлілі ў прыпынак грамадзкага транспарту і ў двор шматпавярховага будынку.Паводле экспэртаў амэрыканскага Інстытуту вывучэньня вайны, расейскія войскі могуць выкарыстаць свае пазыцыі ў раёне Балаклеі, каб аднавіць штурм Харкава з паўднёвага ўсходу (праз Чугуеўскі раён. – РС). Аднак, мяркуюць яны, у расейцаў недастаткова сіл і тылавога забесьпячэньня, каб цалкам захапіць Харкаўскую вобласьць.
На Днепрапятроўшчыне павялічылася геаграфія абстрэлаў
Расейцы ўначы выпусьцілі па Марганцу больш як 60 снарадаў з установак «Град». Улады кажуць, што яны наўмысна цэлілі ў жылыя кварталы. У горадзе пашкоджаныя 8 прыватных будынкаў. Аскепкамі зачапіла кавярню і швейную вытворчасьць. Папярэдне вядома, што дзьве жанчыны атрымалі раненьні, адна зь іх шпіталізаваная і знаходзіцца ў цяжкім стане.
У Чырвонагрыгораўскай грамадзе пацярпелі каля 30 прыватных будынкаў і аўтамабілі мясцовых жыхароў, пашкоджаны лініі электраперадач. У Крывароскім раёне ў выніку абстрэлаў цудам удалося пазьбегнуць ахвяр і разбурэньняў.
Упершыню за апошнія дні расейцы не бамбілі Нікапаля.
Мікалаеў застаецца галоўнай расейскай мэтай на поўдні Ўкраіны
У ноч на 1 жніўня расейскія войскі актыўна абстрэльвалі Мікалаеў. Галоўныя цэлі – прыватныя будынкі, гуманітарны склад з мэдыкамэнтамі і харчамі, а таксама траўмапункт мясцовай лякарні. Папярэдне ўлады гавораць пра трох параненых, але сытуацыю ўдакладняюць.У вобласьці пад прыцэльным агнём застаюцца Мікалаеўскі і Баштанскі раёны. На тэрыторыі гэтых раёнаў ад абстрэлаў загараюцца адкрытыя тэрыторыі, палі са збожжам і лясы.
На поўдні пад адхон пайшоў эшалён з расейскай тэхнікай і жывой сілай
Украінская войска ўжо трэці месяц палюе на расейскія склады з боепрыпасамі на акупаваных тэрыторыях.
У апэратыўным камандаваньні «Поўдзень» паведамілі, што за апошні дзень украінская авіяцыя «накрыла» два апорныя пункты расейцаў у Аляксандраўцы і Благадатным у Херсонскай вобласьці, а ракетна-артылерыйскія падразьдзяленьні – станцыі радыёэлектроннай барацьбы расейскай арміі ў раёне Бяляеўкі на Херсоншчыне.
Апроч таго, украінская выведка пацьвердзіла, што ўкраінскае войска пацэліла ў эшалён з вайсковай тэхнікай, боепрыпасамі і жывой сілай у раёне чыгуначнай станцыі «Брылёўка». Тэхніка, пэўна, накіроўвалася на ўзмацненьне акупацыі Херсону.
За апошнія 24 гадзіны Ўзброеныя сілы Ўкраіны зьнішчылі яшчэ чатыры склады з боепрыпасамі ў двух раёнах – Берыслаўскім (Херсонская вобласьць) і Баштанскім (Мікалаеўская).
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
