Меншую шчыльнасьць абстрэлаў з боку расейскіх войскаў зьвязваюць са зьнішчэньнем украінскай артылерыяй амаль двух дзясяткаў базаў, на якія Расея звозіла боепрыпасы. Усе яны знаходзіліся на адлегласьці 30-50 кілямэтраў ад лініі фронту. Ноч на 14 ліпеня ў большасьці абласьцей прайшла больш спакойна, чым яшчэ некалькі дзён таму, за выключэньнем Луганскай, Данецкай, Днепрапятроўскай, Мікалаеўскай і Запароскай.
Што ўлады паведамляюць аб колькасьці ахвяр і аб разбурэньнях?
Ракетная атака Віньніцы
Раніцай у 10:05 паветраная трывога прагучала ў Кіеве і Кіеўскай вобласьці, а таксама ў Хмяльніцкай, Львоўскай, Закарпацкай, Івана-Франкоўскай, Валынскай і Ровенскай абласьцях.
Як сьцьвярджаюць украінскія вайскоўцы, запуск ракет адбыўся з Чорнага мора.
Праз 40 хвілін пасьля абвяшчэньня трывогі адбылося некалькі моцных выбухаў у Віньніцы. Мясцовыя жыхары паведамляюць, што на месцы працуюць машыны хуткай дапамогі і выратавальнікі. Мінулым разам гэты горад абстрэльвалі ў сакавіку.
Кіраўнік Віньніцкай абласной вайсковай адміністрацыі Сяргей Барзоў паведаміў, што ёсьць загінулыя і параненыя. Іхная колькасьць удакладняецца. Паводле яго, чатыры ракеты над Віньніцай украінскія супрацьпаветраныя сілы зьбілі. У Віньніцы сканцэнтравана найбольшая колькасьць жыхароў Марыюпалю.
Мясцовая паліцыя паведаміла, што тры ракеты пацэлілі ў офісны будынак, пашкоджаны Дом афіцэраў і суседнія жылыя будынкі. Папярэдне — загінулі 17 чалавек, у тым ліку двое дзяцей, і дзясяткі жыхароў атрымалі раненьні.
Паветраную трывогу скасавалі ў Мікалаеўскай вобласьці і абвясьцілі ў Палтаўскай. Грамадзян заклікаюць выконваць абавязковыя захады бясьпекі пры сыгнале паветранай трывогі.
Расейцы спрабуюць прарвацца да Бахмута на Данеччыне
Найбольш ракет — 12 — Расея выпусьціла па населеных пунктах на мяжы Данецкай і Луганскай вобласьці. Пасьля масавых удараў расейскія войскі пачынаюць наступ, каб прарвацца да Северску і адкрыць шлях на Бахмут. Цяпер найбольш актыўныя баявыя дзеяньні вядуцца ў кірунку вёскі Верхнякаменскае — гэта за некалькі кілямэтраў ад ужо захопленай расейцамі Луганскай вобласьці.
Напярэдадні, 13 ліпеня, моцна абстралялі Бахмут. Там адзін жыхар загінуў і яшчэ пяць атрымалі раненьні.
Мікалаеў на другім месцы ў колькасьці абстрэлаў
Дзевяць расейскіх ракет упалі ў Мікалаеве. Як паведамляюць гарадзкія ўлады, у цэнтры гораду пашкоджаны гатэль «Миколаїв». Ударнай хваляй зачапіла і суседні гандлёва-забаўляльны цэнтар. Пашкоджаныя дзьве адукацыйныя ўстановы і аб’ект транспартнай інфраструктуры. Адзін чалавек атрымаў раненьні.
У Мікалаеўскай вобласьці пад абстрэлам застаюцца два раёны — Мікалаеўскі і Баштанскі. Паводле абласных уладаў, у горадзе Баштанка загінуў адзін мясцовы жыхар. Зруйнавана некалькі жылых будынкаў, загарэлася поле са збожжам.
У Запарожжы пашкодзілі 18 інфраструктурных аб’ектаў
Як паведамляюць улады Запароскай вобласьці, расейцы цэляць у цывільную інфраструктуру. Пад прыцэлам населеныя пункты Новаякаўлеўка, Сьцепнагорск і Каменскае.
Расейцы разбураюць лініі электраперадач і газазабесьпячэньня: без электрычнасьці засталіся 77 населеных пунктаў, а без газу — 268 паселішчаў вобласьці.
У такіх умовах улады працягваюць эвакуацыю. Цягам мінулых сутак з захопленых расейцамі населеных пунктаў вывезьлі 1 354 грамадзян, у тым ліку 397 дзяцей.
На Крыўбасе і Харкаўшчыне абстрэлы працягваюцца, у Сумах — спакойна
У Днепрапятроўскай вобласьці абстралялі два населеныя пункты — Вялікую Кастромку і Зеленадольск. Пакуль без ахвяр.
У ноч на 14 ліпеня расейцы двойчы абстралялі два раёны Харкава. Пашкодзілі аб’екты транспартнай інфраструктуры і прыватнае прадпрыемства. Выратавальнікі некалькі разоў выяжджалі на тушэньне пажараў. Папярэдне — без ахвяр і пацярпелых.
Пад абстрэламі застаюцца чатыры раёны вобласьці — Харкаўскі, Багадухаўскі, Чугуеўскі і Ізюмскі. У Чугуеўскім раёне шпіталізавалі двух пацярпелых.
І зусім спакойна прайшла ноч у Сумскай і Чарнігаўскай абласьцях, якія ўвесь час з моманту адступленьня расейскай арміі ў сакавіку абстрэльваюць з тэрыторыі Расеі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
