Мікалаеў абстралялі праз 10 хвілін пасьля паветранай трывогі
Паветраная трывога над Мікалаевам пачалася ў 4:06, і ўжо празь дзесяць хвілін мясцовыя жыхары пачулі моцныя выбухі. Мэр Мікалаева Аляксандар Сянкевіч паведаміў, што ракеты пацэлілі ў дзьве мэдычныя ўстановы і жылыя будынкі. Папярэдне сама меней чацьвёра грамадзян атрымалі раненьні. Абстрэлы выклікалі некалькі вялікіх пажараў, у тым ліку ў двухпавярховым жылым будынку.
У Баштанскім раёне Мікалаеўскай вобласьці расейцы абстрэльвалі адкрытыя тэрыторыі за межамі населеных пунктаў, а ў мястэчку Першамайскае Мікалаеўскага раёну пашкоджана прыватнае сельгаспрадпрыемства. Пацярпелых няма.
На Херсоншчыне ад абстрэлаў гараць лясы і ўгодзьдзі
Украінскія ўлады гавораць пра крытычную сытуацыю ў Херсонскай вобласьці. У выніку абстрэлаў толькі з пачатку ліпеня ў вобласьці зафіксавалі 75 маштабных пажараў.
Паводле эколягаў, з пачатку вайны пажары, выкліканыя моцнымі ракетнымі ўдарамі, зьнішчылі экасыстэмы больш як на 100 тысячах гектараў.
У вобласьці працягваюць фармаваць акупацыйную ўладу і залучаць у яе шэрагі грамадзян Украіны.
Паліцыя Херсонскай вобласьці паведаміла, што расейцы захапілі Інстытут жывёлагадоўлі стэпавых раёнаў «Асканія Нова».
У горадзе Часаў Яр з-пад завалаў дасталі цела 9-гадовага хлопчыка
Украінскія ратавальнікі працягваюць разьбіраць завалы разбуранага пяціпавярховага дома ў горадзе Часаў Яр на Данеччыне. Уначы змаглі дастаць яшчэ некалькі целаў, у тым ліку 9-гадовага хлопчыка. Агульная колькасьць загінулых у выніку абстрэлу жылога дома павялічылася да 38.
Расейцы працягваюць абстрэльваць Тарэцк і Славянск. За апошнія 24 гадзіны ў Данецкай вобласьці загінулі 9 цывільных і яшчэ 2 атрымалі раненьні.
Адначасова расейскія войскі накіроўваюць ракетныя ўдары на мяжу Луганскай і Данецкай абласьцей, дзе знаходзяцца пазыцыі ўкраінскага войска.
У Харкаве і Харкаўскай вобласьці абстрэлы не спыняюцца
Улады Харкаўскай вобласьці паведамілі, што ўначы ў Харкаў прыляцелі дзьве расейскія ракеты, але яны трапілі між будынкамі, таму абышлося без ахвяр.
Не спыняюцца абстрэлы трох раёнаў вобласьці: Ізюмскага, Багадухаўскага і Харкаўскага.
Цягам апошніх сутак у вобласьці загінулі 7 грамадзян і 34 атрымалі раненьні.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
