Гэтыя здымкі апублікавалі журналісты праекту «Схемы» ўкраінскай службы Радыё Свабода.
Паводле зьвестак Марыюпальскай гарадзкой рады, там могуць быць пахаваныя больш за 15 тысяч гараджан.
29 чэрвеня спадарожнік зафіксаваў тэхніку, з дапамогай якой акупанты працягваюць капаць траншэі на могілках каля пасёлку Стары Крым Данецкай вобласьці, што непадалёк ад Марыюпалю.
З часоў акупацыі гораду ў такіх траншэях масава хавалі забітых жыхароў. У параўнаньні са спадарожнікавым здымкам Planet Labs ад 8 траўня, апублікаваным раней «Схемамі», брацкіх магіл на гэтых могілках стала амаль удвая больш.
У камэнтары «Схемам» дарадца мэра Марыюпалю Пятро Андрушчанка патлумачыў гэта тым, што акупанты пачалі разьбіраць завалы пашкоджаных і разбураных расейскім войскам шматпавярховых дамоў. Паводле яго, у кожным з гэтых дамоў можа знаходзіцца да сотні загінулых мясцовых жыхароў. Часьцей за ўсё целы вывозяць у Стары Крым — там найбліжэйшыя да Марыюпалю могілкі зь месцамі масавых пахаваньняў.
Раней «Схемы» паведамлялі пра тры масавыя пахаваньні, выяўленыя пад Марыюпалем, — каля пасёлку Стары Крым, пасёлку Вінаграднае і каля могілак пасёлку Мангуш. Пазьней спадарожнік зафіксаваў чацьвёртае месца масавых пахаваньняў у цэнтры Марыюпалю.
Марыюпаль быў аточаны расейскімі войскамі ў першыя дні шырокамаштабнага расейскага ўварваньня, якое пачалося 24 лютага. 8 траўня ўкраінскі прэзыдэнт Уладзімір Зяленскі заявіў, што ва Ўкраіны няма магчымасьці разблякаваць Марыюпаль ваенным шляхам. У хуткім часе пасьля гэтага ўкраінскія вайскоўцы, якія знаходзіліся на на заводзе «Азоўсталь» у Марыюпалі, на загад камандаваньня склалі зброю. Пасьля гэтага расейскі бок заявіў, што бярэ іх у палон, а частку вайскоўцаў будуць судзіць.
Кіраўнік Офісу прэзыдэнта Ўкраіны паведаміў, што ўкраінскія абаронцы Марыюпалю, якія знаходзяцца ў расейскім палоне, жывыя, але невядома, у якіх яны цяпер умовах.
Пазьней таксама адбыўся абмен, падчас якога з расейскага палону былі вызваленыя 144 украінскія вайскоўцы, у тым ліку 95 абаронцаў «Азоўсталі».
