Прэм’ер-міністар Украіны Дзяніс Шмыгаль заявіў, што на паваеннае аднаўленьне Ўкраіны спатрэбіцца ня менш за 750 мільярдаў даляраў.
«Хто мусіць заплаціць за плян аднаўленьня, які ўжо цяпер ацэньваецца ў 750 мільярдаў. Мы лічым, што ключавой крыніцай аднаўленьня мусяць быць сканфіскаваныя актывы Расеі і расейскіх алігархаў. Расейская ўлада разьвязала гэтую крывавую вайну. Яны выклікалі такія маштабныя руйнаваньні, і яны павінны несьці за гэта адказнасьць», — сказаў Дзяніс Шмыгаль на міжнароднай канфэрэнцыі аб аднаўленьні Ўкраіны ў Люгана (Швайцарыя).
Паводле яго, цяпер замарожаныя актывы складаюць ад 300 да 500 мільярдаў даляраў. «Частка краін ужо пачалі працэсы ня проста замарожваньня, але і канфіскацыі гэтых актываў», — дадаў кіраўнік украінскага ўраду.
4 ліпеня прэзыдэнт Украіны Ўладзімір Зяленскі, выступаючы на канфэрэнцыі празь відэасувязь, заявіў, што аднаўленьне Ўкраіны павінна стаць супольнай задачай для ўсяго цывілізаванага сьвету.
«Вайна — гэта ня проста недзе на ўсходзе Эўропы. Гэта напад Расеі на ўсё, што зьяўляецца каштоўнасьцю для нас з вамі. Таму і адбудова Ўкраіны — гэта не лякальны праект. Не праект аднаго народу, а супольнае заданьне ўсяго дэмакратычнага сьвету, усіх краін, якія могуць сказаць пра сябе: мы цывілізаваныя», – заявіў Уладзімір Зяленскі на міжнароднай канфэрэнцыі ў пытаньнях аднаўленьня Ўкраіны, якая праходзіць у Лугана (Швайцарыя).
Па выніках канфэрэнцыі яе ўдзельнікі падпісалі выніковую дэклярацыю, у якой зацьвердзілі прапанаваны Ўкраінай плян паваеннага аднаўленьня. Згодна з дакумэнтам, будзе створаная каардынацыйная плятформа для падрыхтоўкі рэалізацыі пляну, у якім вызначана сем прынцыпаў і кірункаў супрацы — партнэрства, накіраванасьць на рэформы, празрыстасьць і вяршэнства права, дэмакратычны ўдзел, далучэньне шматлікіх зацікаўленых бакоў, гендэрная роўнасьць і інклюзія, а таксама сталае разьвіцьцё.
Трэба сотні мільярдаў даляраў
У канфэрэнцыі ўдзельнічаюць прадстаўнікі 40 краін і 18 міжнародных арганізацый. У склад украінскай дэлегацыі ўвайшлі кіраўнік ураду Дзяніс Шмыгаль і старшыня Вярхоўнай Рады Руслан Стэфанчук.
Як паведамляе ВВС, сярод схем фінансаваньня рэканструкцыі Ўкраіны — новы фонд, стварыць які, па дадзеных крыніц СМІ, мае намер Эўрапейскі банк рэканструкцыі і разьвіцьця. Фонд можа сабраць каля 100 мільярдаў эўра зь сяброў ЭЗ і іншых краін сьвету.
Паводле падлікаў Кіеўскай школы эканомікі, шкода, нанесеная ўкраінскім дамам і інфраструктуры, складае амаль 104 мільярды даляраў: разбурана каля 45 мільёнаў квадратных мэтраў забудовы, 256 прадпрыемстваў, 656 мэдычных устаноў і 1177 навучальных устаноў.
Экспэрты школы ацанілі шкоду ўкраінскай эканоміцы ў 600 мільярдаў даляраў. Карэспандэнт аўтарытэтнага часопіса Foreign Policy ў сваёй апошняй публікацыі ацаніў кошт пасьляваеннага аднаўленьня Ўкраіны больш як у 1 трлн даляраў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
