Падчас свайго першага візыту ва Ўкраіну ў якасьці кіраўніка аўстралійскага ўраду Энтані Альбанэзэ заявіў на прэс-канфэрэнцыі ў Кіеве, што Аўстралія акажа Ўкраіне «вайсковую дапамогу ў абʼёме 100 мільёнаў даляраў», не ўдакладніўшы, гаворка ідзе пра даляры ЗША ці Аўстраліі (100 мільёнаў даляраў ЗША эквівалентныя 68 мільёнам аўстралійскіх даляраў).
Прэмʼер-міністар адзначыў, што Аўстралія выдзеліць дадатковую вайсковую тэхніку, запрошаную Ўкраінай, уключаючы 14 бронетранспартэраў, 20 бронемашын Bushmaster і некалькі бесьпілотнікаў, піша Agence France-Presse.
Зяленскі заявіў, што Аўстралія аказвае Ўкраіне «важкую дапамогу, у тым ліку абаронную». Па словах украінскага лідэра, украінскія вайскоўцы «высока ацанілі» бронемашыны Bushmaster.
Альбанезе таксама наведаў Бучу і Ірпень, дзе расейскія войскі, як сьцьвярджаецца, учынілі ваенныя злачынствы, а таксама аэрапорт Гастомель.
«Для мяне вялікі гонар быць першым прэмʼер-міністрам Аўстраліі, які наведаў Украіну», — сказаў ён, адзначыўшы, што яго паездка «вельмі дакладна прадэманструе ўсім сьвеце салідарнасьць аўстралійскага народу з народам Украіны».
Аўстралійскі палітык таксама згадаў магчымы візыт Уладзіміра Пуціна на саміт «Вялікай дваццаткі» ў Інданэзіі. Альбанезэ папярэдзіў, калі прэзыдэнт РФ прыедзе на сустрэчу G20 (што дапусьціў Крэмль), ён атрымае прыём, «якога заслугоўвае».
«Калі спадар Пуцін прыедзе на гэтую сустрэчу, ён атрымае прыём, якога ён заслугоўвае, і гэта будзе не дружалюбны прыём, не прыём чалавека, які паважае міжнароднае вяршэнства закону», — заявіў аўстралійскі прэмʼер.
У той жа час ён заявіў, што ня можа ўявіць, каб Аўстралія байкатавала саміт, хаця «спадзяецца на ізаляцыю Расеі, наколькі гэта магчыма».
Альбанэзэ прыехаў ва Ўкраіну пасьля сустрэчы з прэзыдэнтам Францыі Эманюэлем Макронам у Парыжы ў 1 ліпеня.
У чэрвені Ўкраіна паведаміла аб гібелі грамадзяніна Аўстраліі, які змагаўся ў складзе Інтэрнацыянальнага легіёну абароны Украіны — афіцыйнага добраахвотніцкага фармаваньня.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
