Галоўнага рэдактара «НН» перавялі ў Гомель
Галоўны рэдактар газэты «Наша ніва» Ягор Марціновіч цяпер знаходзіцца ў Гомлі, куды яго перавялі з Магілёва. Неўзабаве яго перавядуць у бабруйскую калёнію, напісаў у фэйсбуку ягоны брат Дзяніс.
Новым адрасам Марціновіча будзе: 213800, г. Бабруйск, вул. Сікорскага, 1а, ПК № 2.
Таксама брат Ягора адзначыў, што лісты варта дасылаць не раней за 10 чэрвеня і абавязкова падпісваць канвэрт словам «Карантын».
Ягор Марціновіч разам з калегам з «Нашай нівы» Андрэем Скурко асуджаны на 2,5 года турмы паводле ч. 2 арт. 216 Крымінальнага кодэксу (прычыненьне маёмаснай шкоды без прыкмет крадзяжу, учыненае групай асоб па папярэдняй змове або ў буйным памеры). Праваабаронцы, прааналізаваўшы абставіны справы, назвалі яе палітычна матываванай, а Марціновіча і Скурко — палітвязьнямі.
