Калі высьветліцца, што ацэнкі пра сотні забітых або параненых салдат дакладныя, гэта будзе адно з самых сьмяротных вядомых баявых дзеяньняў у гэтай вайне, піша New York Times.
Разгром на пераправе
Зьнішчэньне расейскага батальёну пры ягонай спробе перайсьці раку ў паўночна-ўсходняй Украіне на мінулым тыдні — у шэрагу найбольш сьмяротных сутыкненьняў гэтай вайны: паводле ацэнак, заснаваных на агульнадаступных зьвестках, там больш за 400 расейскіх салдат былі забітыя або параненыя.
І па меры таго, як маштаб падзеі становіцца ўсё больш акрэсьленым, катастрофа, здаецца, прарываецца праз інфармацыйную бурбалку, якую жорстка кантралюе Крэмль.
Мабыць, найбольш уражвае тое, што няўдача на полі расейскай бітвы знайшла водгук у прарасейскіх ваенных блогераў (некаторыя зь іх працуюць з войскамі на перадавой) — якія верна пісалі ў Telegram тэксты пра посьпехі расейцаў і баязьлівасьць украінцаў.
«Камэнтары гэтых шырока чытаных блогераў могуць распальваць у Расеі сумневы адносна пэрспэктыў Расеі ў гэтай вайне і кампэтэнцыі расейскіх вайсковых кіраўнікоў», — напісаў у мінулыя выходныя Інстытут вывучэньня вайны, што базуецца ў Вашынгтоне.
11 траўня расейскае камандаваньне накіравала каля 550 вайскоўцаў 74-й мотастралковай брыгады 41-й агульнавайсковай арміі пераправіцца праз раку Северскі Данец у Белагораўцы на ўсходзе Луганскай вобласьці, каб атачыць украінскія сілы пад Рубежным.
Спадарожнікавыя здымкі паказваюць, што ўкраінская артылерыя разбурыла некалькі расейскіх пантонных мастоў і зьнішчыла шчыльную канцэнтрацыю расейскіх войскаў і тэхнікі вакол ракі.
Інстытут вывучэньня вайны, спасылаючыся на аналіз на падставе агульнадаступных здымкаў, паказаў, што магло быць да 485 забітых або параненых расейскіх салдат і зьнішчана звыш 80 адзінак тэхнікі.
Калі навіна пра страты на пераправе ў Белагораўцы пачала пашырацца, некаторыя прарасейскія блогеры ня стрымліваліся ў крытыцы некампэтэнтнага, на іх думку, кіраўніцтва.
Што пішуць праваенныя расейскія блогеры
«Я доўга маўчаў», — заявіў у апублікаваным у пятніцу відэа Юрый Падаляка, ваенны блогер, які мае 2,1 мільёна падпісчыкаў у Telegram. Ён заявіў, што дагэтуль пазьбягаў крытыкі расейскіх вайскоўцаў.
«Апошняй кропляй, якая перапоўніла маё цярпеньне, сталі падзеі вакол Белагораўкі, дзе праз глупства — я падкрэсьліваю, праз глупства расейскага камандаваньня — была спаленая як мінімум адна батальённая тактычная група, магчыма, дзьве».
Спадар Падаляка высьмеяў тэзу Крамля, што вайна ідзе «паводле пляну». У пяціхвілінным відэа ён паведаміў сваім гледачам, што насамрэч расейскай арміі «катастрафічна не хапае на фронце» функцыянальных бесьпілётных лятальных апаратаў, прыбораў начнога бачаньня і іншага.
«Так, я разумею, што на вайне ня можа ня быць праблем, — сказаў ён. — Але калі тры месяцы ідуць адны і тыя ж праблемы, і, здаецца, нічога не мяняецца, то ў мяне асабіста і фактычна ў мільёнаў грамадзян Расейскай Фэдэрацыі пачынаюцца пытаньні да гэтых кіраўнікоў ваеннай апэрацыі».
Другі папулярны блогер пад нікам Starshe Eddy ў Telegram напісаў, што той факт, што камандзіры пакінулі так шмат сваіх сіл выкрытымі, быў «не ідыятызмам, а прамым сабатажам».
А трэці, Уладлен Татарскі, паведаміў, што наступ Расеі на ўсходзе рухаецца павольна ня толькі праз адсутнасьць дронаў для назіраньня, але і праз «гэтых генэралаў» і іх тактыкі.
«Пакуль мы не атрымаем прозьвішча ваеннага генія, які паклаў БТГ (батальённая тактычная група. — РС) ля ракі, і ён за гэта не адкажа публічна, ніякіх вайсковых рэформаў у нас ня будзе», — напісаў спадар Татарскі.
Заходнія ваенныя аналітыкі таксама вывучылі выявы і кажуць, што спроба пераправы прадэманстравала ашаламляльную адсутнасьць тактычнага сэнсу.
Яны выказвалі здагадку, што расейскія камандзіры, адчайна стараючыся дасягнуць прагрэсу, прысьпешвалі апэрацыю. Некаторыя таксама выказалі здагадку, што гэта адбітак бязладзьдзя ў расейскіх шэрагах.
Калі ацэнкі, што сотні салдат былі забітыя або параненыя, акажуцца дакладнымі, гэта будзе адна з самых сьмяротных апэрацый у цяперашняй вайне.
На борце расейскага чарнаморскага флягмана «Масква», калі ў красавіку яго патапіла ўкраінская ракета, знаходзілася больш за 500 маракоў.
Крэмль спачатку настойваў, што ўратаваліся ўсе маракі, пазьней заявіў, што адзін быў забіты. Але нават калі сем’і зьніклых маракоў публічна патрабавалі адказаў, Крэмль у значнай ступені захоўваў і дагэтуль захоўвае афіцыйнае маўчаньне пра лёс экіпажа. Гэта частка больш маштабнай кампаніі па ўтойваньні дрэнных навін.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
