«Гэта вестка ўзрушыла нас усіх. Пра здарэньне стала вядома ўчора, 9 траўня. Сяргей быў заўзяты рыбак. Вядома, што Ніжнія Жары — Мэка для беларускіх рыбакоў. Таму на сьвяты і Сяргей быў там, на Дняпры. Што здарылася менавіта — невядома. Факт той, што чалавек не жыве больш. Кажуць, застрэлілі. Можа, гэта былі і паляўнічыя», — расказала знаёмая сям’і.
Сяргей Чамбровіч скончыў Віцебскую вэтэрынарную акадэмію, шмат гадоў працаваў вэтэрынарам, апошнім часам — у ААТ «ПолiВетКлiнiка».
«Добры, сьціплы, добразычлівы, прафэсіянал, нікому ніколі не адмаўляў у дапамозе. Валянтэры часта зьвярталіся да яго па пытаньнях стэрылізацыі, лячэньня жывёл — ён нікому не адмаўляў», — кажа адна з жыхарак Гомля, якая займаецца дапамогай бадзяжным жывёлам.
Жонка нябожчыка працуе ў вэтэрынарнай аптэцы. У сям’і — двое сыноў, 12 і 19 гадоў. Вядома, што вядзецца сьледзтва.
У памежных з Украінай раёнах Гомельскай вобласьці забаронена наведваць лясы. Брагінскі і Лоеўскі раёны ў красавіку сваімі рашэньнямі забаранілі плаваць на лодках па Дняпры і Сажы на мяжы з Украінай. Прычыны забароны не тлумачыліся.
5 красавіка ў Мазыры хавалі супрацоўніка КДБ, які падарваўся на міне каля вёскі Белая Сарока Нараўлянскага раёну.
