«Нашай ніве» стала вядома, што «Белмэдпрэпараты» пераходзяць на чатырохдзённы працоўны тыдзень з 14 чэрвеня як мінімум да канца ліпеня. Такі загад выдаў «Белфармпрам».
Распараджэньне датычыць амаль усіх аддзелаў прадпрыемства: закупак, продажаў і маркетынгу, бухгальтэрыі, кадраў, фармаканагляду, санітарна-прамысловай лябараторыі, вядучых інжынэраў і гэтак далей. Выключэньне — генэральны дырэктар.
Дадатковым выходным становіцца пятніца, аплата работы — «прапарцыйна фактычна адпрацаванаму часу». Прычыны рашэньня ў распараджэньні тлумачацца фармулёўкай: «У мэтах аптымізацыі выдаткаў».
Раней паведамлялася, што «Белмэдпрэпараты» сутыкнуліся зь цяжкасьцямі ў вытворчасьці мэдыкамэнтаў: з прычыны санкцый адгрузка некаторых прэпаратаў не плянуецца ў наступныя месяцы ці наагул у 2022 годзе.
У сваю чаргу аб тым, што ўведзеныя ў дачыненьні да Беларусі санкцыі паўплывалі і на працу Беларускага мэталюргічнага заводу, заявіў у эфіры СТВ гендырэктар прадпрыемства Дзьмітры Корчык.
Ён прызнаў, што страціў у выніку санкцый высокамаржынальны рынак Эўропы.
«Мы актывізавалі ўсю нашу працу на замежных рынках у частцы менавіта дывэрсыфікацыі нашага экспарту. Чаму? Таму што рынак Эўразьвязу быў адным з асноўных нашых рынкаў, на якім прадавалася высокамаржынальная прадукцыя. Гэта мэталакорд, труба. Уся каманда БМЗ, якая менавіта займаецца адказна гэтым напрамкам, у працы, у разьездах, гэта значыць вядуць перамовы, заключаем кантракты, аптымізуем нашы лягістычныя ўсе шляхі і гэтак далей. Працуем з адпаведнымі міністэрствамі. Задача такая — мінімізаваць усе страты, якія могуць быць, і забясьпечыць рытмічную працу прадпрыемства», — сказаў Корчык.
Міністарка працы Ірына Касьцевіч прызнала ў эфіры «Беларусь-1» рост няпоўнай занятасьці і прастояў пасьля ўвядзеньня санкцый.
«Сёньня новыя выклікі. Прычым гэтыя выклікі і пагрозы, якія ідуць па вонкавым контуры, прырастаюць, і мы гэта бачым. Рынак на гэта адрэагаваў. Апошнія два месяцы, сакавік-красавік, мы бачым рост вымушанай няпоўнай занятасьці, рост прастояў, калектывы перастройваюць сваю працу».
У якасьці вырашэньня праблемы кіраўніца Мінпрацы прапанавала выкарыстаць часовы перавод да іншага наймальніка, дзе сёньня ёсьць замовы, і часовую занятасьць — сэзонна-палявыя работы.
Санкцыі супраць Беларусі за падтрымку расейскай вайны ва Ўкраіне
Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.
Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».
26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.
28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.
Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.
У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.
Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.
Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.
5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.
6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».
8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».
Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.
Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.
Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.
Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.
9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.
22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.
28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.
20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.
