Адначасна ў беларускіх Telegram-каналах пачала зьяўляцца інфармацыя, што непадалёк ад украінскай мяжы падарваліся на міне ці супрацоўнікі КДБ, ці памежнікі, ці інспэктары аховы прыроды.
Свабода сабрала тое, што вядома на гэты момант.
У Мазыры рытуальны мікрааўтобус сапраўды выяжджаў са двара будынку, дзе разьмешчаны Мазырскі гарадзкі аддзел КДБ Гомельскай вобласьці. Свабода мае гэтаму пацьверджаньні. За рытуальным мікрааўтобусам ішлі мужчыны ў цывільным, за імі — людзі ў вайсковай форме. Побач быў прыпаркаваны аўтамабіль Toyota зь літарай «V» на борце (адзін з апазнавальным знакаў, якім карыстаюцца расейскія вайскоўцы падчас агрэсіі супраць Украіны).
Адна з крыніц Свабоды паведаміла, што хавалі супрацоўніка мясцовага КДБ, падпалкоўніка Андрэя Р. Чалавек з такімі дадзенымі сапраўды служыў у КДБ. У 2018 годзе ён атрымаў ад мазырскіх уладаў узнагароду да 100-годзьдзя Узброеных сілаў.
Іншая крыніца Свабоды расказвае, што «УАЗік», у якім знаходзіўся супрацоўнік КДБ, падарваўся на міне ў зоне адсяленьня, каля вёскі Белая Сарока Нараўлянскага раёну.
«Гэта беларуская тэрыторыя, адкуль там міны? Але ёсьць такая інфармацыя, што кіроўцу проста разарвала на часткі. Пасьля мясцовасьць абсьледавалі і знайшлі яшчэ дзесяць мін. Адкуль яны — невядома», — зазначыла крыніца.
Афіцыйнай інфармацыі з нагоды сьмерці двух чалавек не было. Дзяржаўныя СМІ, у тым ліку і мазырская газэта «Жыццё Палесся» не публікавалі нэкралёгаў.
