Украінскую дэлегацыю ўзначальвае міністар абароны Аляксей Рэзьнікаў. Расейскую дэлегацыю — дарадца Пуціна Ўладзімір Мядзінскі.
Прэзыдэнт Турэччыны Рэджэп Таіп Эрдаган разьлічвае, што дэлегацыі Ўкраіны і Расеі на перамовах у Турэччыне змогуць знайсьці рашэньне, якое «верне працэс у праўнае рэчышча».
«Усе чакаюць ад вас добрай весткі», — сказаў Рэджэп Таіп Эрдаган, зьвяртаючыся да ўкраінскай і расейскай дэлегацыяў, якія прыбылі ў Турэччыну для перамоваў аб завяршэньні вайны.
«Я веру, што вы не пабаіцеся ўзяць ініцыятыву ў свае рукі. Мы не адыграем ролі ў самім працэсе, але спрабуем забясьпечыць вам усё магчымае для працягу перамоўнага працэсу. Мы ўпэўненыя, што рашэньні, якія будуць ухваленыя, забясьпечаць мір. Адказнасьць за гэта ляжыць на нас», — заявіў прэзыдэнт Турэччыны.
Эрдаган дадаў, што Турэччына «гатовая забясьпечыць гасьціннасьць» дэлегацыям: «З вамі цяпер зьвязана чаканьне. Я зычу, каб перамовы далі пазытыўны вынік», — дадаў ён. Прэзыдэнт Турэччыны таксама перадаў прывітаньні «лідэрам абедзьвюх краін», якія зьяўляюцца для яго сябрамі.
ТАСС паведаміў, што расейскі мільярдэр Раман Абрамовіч таксама ў Стамбуле.
«Праграмай-мінімум будуць гуманітарныя пытаньні, а праграмай-максымум — дасягненьне дамоўленасьці аб спыненьні агню», — заявіў кіраўнік украінскага МЗС Дзьмітро Кулеба ў этэры нацыянальнай тэлевізіі, падкрэсьліўшы, што Ўкраіна «не гандлюе людзьмі, зямлёй ці сувэрэнітэтам».
Высокапастаўлены прадстаўнік Дзяржаўнага дэпартамэнту ЗША напярэдадні перамоваў заявіў у інтэрвію агенцтву Reuters на ўмовах ананімнасьці, што «Пуцін, здаецца, не гатовы ісьці на кампрамісы дзеля спыненьня вайны».
Прэс-сакратар Крамля Дзьмітрый Пяскоў зазначыў, што перамовы пакуль не прывялі да якіх-небудзь істотных прарываў, але важна, каб яны працягнуліся ў асабістым фармаце.
З пачатку расейскага ўварваньня ва Ўкраіну 24 лютага Расея і Ўкраіна правялі 5 раўндаў перамоваў, 2 зь іх у відэафармаце. Апошнія перамовы расейскай і ўкраінскай дэлегацый сам-насам былі 7 сакавіка. Акрамя таго, 10 сакавіка кіраўнікі расейскага і ўкраінскага МЗС сустракаліся ў турэцкай Антальлі ў рамках дыпляматычнага форуму.
Тады Ўкраіна абвінаваціла Сяргея Лаўрова ў ігнараваньні заклікаў абмеркаваць спыненьне агню, а Лаўроў заявіў, што спыненьне баявых дзеяньняў нават не стаіць на парадку дня.
З таго часу Ўкраіна і Расея правялі перамовы празь відэасувязь і публічна абмеркавалі формулу, паводле якой Украіна магла б прыняць нейкі фармальны нэўтральны статус.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
