Украіна была адным з асноўных гандлёвых партнэраў Беларусі. Шмат гадоў Беларусь пастаўляла ва Ўкраіну нафтапрадукты, калійныя ўгнаеньні, электрычнасьць. А Ўкраіна прадавала ў Беларусь шмат прадуктаў харчаваньня. Летась Беларусь закупіла ва Ўкраіне тавараў на 1,4 мільярда даляраў. Цяпер многія ўкраінскія прадукты могуць зьнікнуць з паліц беларускіх крамаў. Вось якія зьвесткі дае Белстат.
Украінская бульба
Летась Украіна прадала ў Беларусь бульбы на 4,9 мільёна даляраў. Гэта 42% ад агульнай колькасьці бульбы, якую Беларусь закупіла за мяжой. У Расеі летась Беларусь закупіла бульбы ўдвая меней.
Сьвежыя ягады
Украіна — адзін з асноўных пастаўшчыкоў сьвежых ягад у Беларусь. Летась Беларусь набыла ва Ўкраіне сьвежых ягад на 2,3 мільёна даляраў. Гэта 34% агульнага абʼёму паставак гэтага тавару.
Жыта
Летась Беларусь закупіла жыта на 3,6 мільёна даляраў. 38% ад гэтага — ва Ўкраіне. Менавіта з жыта робяць муку, якая ідзе на вытворчасьць хлеба.
Кукуруза
Украіна ў мінулым годзе прадала Беларусі кукурузы на 10,4 мільёна даляраў. Гэта 17% ад агульнай колькасьці прывезенай у Беларусь летась кукурузы.
Соевыя бабы
Украіна — асноўны пастаўшчык соевых бабоў у Беларусь. Летась Беларусь набыла ва Ўкраіне 70% ад агульнай колькасьці імпарту гэтага прадукту.
Кансэрваваныя малюскі
Украіна пастаўляла ў Беларусь кансэрваваныя крэвэткі, мідыі, кансэрвы зь іншых ракападобных і малюскаў. Летась Беларусь закупіла гэтых тавараў на 18,5 мільёна даляраў, траціну — ва Ўкраіне.
Шакаляд
Кандытарскія вырабы з Украіны — таксама раней часта можна было заўважыць на паліцах беларускіх крамаў. Летась Беларусь закупіла шакаляду на 129,7 мільёна даляраў. 7% з гэтага — ва Ўкраіне.
Макарона
Украіна пастаўляла ў Беларусь макарону. Летась 17% ад агульнай колькасьці макароны, завезенай у Беларусь, прывезьлі з Украіны.
Хлеб ды іншыя кандытарскія вырабы
І нават хлеб Беларусь закупляла ва Ўкраіне. Так, летась на долю Ўкраіны прыпала 12% беларускага імпарту хлеба і кандытарскіх вырабаў. Апроч хлеба — гэта печыва, вафлі ды іншыя кандытарскія вырабы.
Сокі
Частка сокаў, якія прадаваліся ў беларускіх крамах, — таксама ўкраінскай вытворчасьці. Летась Беларусь набыла ва Ўкраіне сокаў на 5,8 мільёна даляраў. Гэта 18% ад агульнай колькасьці імпартаваных сокаў у мінулым годзе. Напрыклад, асноўным пастаўшчыком яблычнага соку летась была Ўкраіна — 61,9% ад агульнага імпарту гэтага прадукту.
Соўсы
Украінскія маркі соўсаў добра знаёмыя беларусам. Летась 13,8% завезеных у Беларусь соўсаў і кетчупаў былі вырабленыя ва Ўкраіне.
Піва
Украінскае піва часта можна было пабачыць на паліцах беларускіх крамаў. Летась 10% завезенага ў Беларусь імпартнага піва было з Украіны.
Сланечнікавы алей
Украіна — адзін з асноўных пастаўшчыкоў сланечнікавага алею ў сьвеце. Летась Беларусь набыла ва Ўкраіне сланечнікавага алею на 10,4 мільёна даляраў. Але ўсё ж асноўным яго пастаўшчыком у Беларусь застаецца Расея — летась гэтага прадукту там набылі на 115 мільёнаў даляраў.
