За апошнія дні спэцслужбы Беларусі арыштавалі мінімум 8 чалавек, якіх падазраюць у зрыве графіку руху расейскіх цягнікоў з вайсковай тэхнікай і пашкоджаньні інфраструктуры чыгункі, піша «Вясна».
З 28 лютага на 1 сакавіка на тэрыторыі Магілёўскай, Гомельскай і Менскай абласьцей зафіксаваныя тры факты зьнішчэньня сыгнальнага абсталяваньня, блякаваньня чыгуначных шляхоў, пісала МУС. Па гэтых фактах завялі крымінальныя справы па арт. 289 Крымінальнага кодэксу (Акт тэрарызму).
Віцебск: «Плянаваў дывэрсію»
6 сакавіка супрацоўнікі ГУБАЗіКу і АМАПу затрымалі жыхара Віцебску. Паводле МУС, той нібыта плянаваў вывесьці са строю сыстэмы, якія забясьпечваюць бясьпеку чыгуначнага руху.
Затрыманы — супрацоўнік Віцебскай дыстанцыі сыгналізацыі і сувязі УП «Віцебскае аддзяленьне Беларускай чыгункі» Сяргей Канавалаў. Пра гэта паведамляў тэлеграм-канал чыгуначнікаў, які лічыць, што Канавалава арыштавалі беспадстаўна.
Сьветлагорск: «Спалілі шафу сыгнальнай устаноўкі на чыгунцы»
З 2 сакавіка ў Сьветлагорску праходзілі ператрусы. Прычынай стала, тое што на перагоне Астанковічы — Жэрдзь гомельскага аддзяленьня Беларускай чыгункі спалілі рэлейную шафу сыгналізацыі, цэнтралізацыі і блякаваньня (СЦБ). У выніку сьвятлафоры і стрэлачныя пераводы на гэтым участку перасталі працаваць.
Перагон Астанковічы — Жэрдзь знаходзіцца на лініі Жлобін — Калінкавічы, якая затым працягваецца на Оўруч (Жытомірская вобласьць Украіны). Лінію пабудавалі як найкарацейшы шлях для вайсковых эшалёнаў у бок Украіны падчас Першай сусьветнай вайны.
Праваабаронцам вядома, што 4 сакавіка ў Сьветлагорску затрымалі сямейную пару Дзьмітрыя і Натальлю Равіч, брата Натальлі Дзяніса Дзікуна і яго дзяўчыну Алісу Маланаву. У праўладных тэлеграм-каналах зьявілася пакаяннае відэа зь Дзянісам Дзікуном, на якім ён выглядае зьбітым. Хлопец гаворыць на камэру, што падпаліў яшчэ з двума людзьмі 28 лютага шафу сыгнальнай устаноўкі на станцыі «Жэрдзь-Астанковічы».
На трох затрыманых завялі крымінальную справу за акт тэрарызму.
Асіповічы: «Выказаў гатоўнасьць садзейнічаць акцыям прамога дзеяньня»
2 сакавіка супрацоўнікі ГУБАЗіку ў Асіповічах затрымалі 43-гадовага мясцовага жыхара Аляксея Шышкаўца. МУС сьцьвярджае, што на пачатку 2022 году мужчына «ўвайшоў у склад экстрэмісцкага фармаваньня BYPOL, аўтарызаваўшыся ў мабілізацыйным чат-боце для зьдзяйсьненьня супрацьпраўных дзеяньняў у Беларусі». 1 сакавіка ён нібыта атрымаў указаньні па блякаваньні чыгуначных шляхоў, а таксама па вырабе і выкарыстаньні «кактэйляў Молатава».
Супраць яго распачалі крымінальную справу «за ўдзел у экстрэмісцкім фармаваньні з мэтай учыненьня злачынстваў экстрэмісцкай накіраванасьці» (арт. 361-1 КК).
«Ён выказаў актыўную гатоўнасьць садзейнічаць акцыям прамога дзеяньня на аб’ектах чыгункі ў раёне Асіповічаў з мэтай правядзеньня дывэрсій і недапушчэньня прасоўваньня эшалёнаў з вайсковай тэхнікай», — паведаміў начальнік магілёўскага абласнога ўпраўленьня ГУБАЗіК МУС Міхаіл Сухачоў.
Стоўпцы і Жодзіна
У ноч з 1 на 2 сакавіка ў Стоўпцах затрымалі Сяргея Глебку і ягоную жонку Кацярыну, якія, паводле МУС, на чыгуначных шляхах падпалілі бярвеньні, каб перашкодзіць руху цягнікоў.
У сям’і трое непаўналетніх дзяцей. На «пакаянным» відэа заўважна, што ў Сяргея на твары сінякі. Супраць пары распачалі крымінальную справу па арт. 289 КК (акт тэрарызму).
Таксама вядома, што 2 сакавіка ў Жодзіне сілавікі затрымалі 35-гадовага «рэйкавага партызана». Аднак падрабязнасьці справы не паведамляюцца.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
