У Херсоне ўкраінцы кладуцца пад колы расейскай тэхнікі
Ахвяры, кроў і разбурэньні
Расея працягвае наносіць удары па мірных гарадах Украіны.
У выніку расейскага авіяўдару ў вёсцы Мархалёўка паблізу Кіева загінулі шэсьць чалавек, у тым ліку дзіця
Пра гэта паведаміла рэгіянальная паліцыя. Паводле яе зьвестак, яшчэ двое дарослых і двое дзяцей атрымалі раненьні, іх даставілі ў лякарню.
Налёты расейскай авіяцыі не спыняюцца ў розных рэгіёнах Украіны. У Чарнігаве, паводле ўдакладненых зьвестак, у выніку бамбаваньня жылога масіву 3 сакавіка загінулі больш за 40 чалавек. Гэта перадало агенцтва УНІАН з спасылкай на прэс-службу абласной адміністрацыі.
Апытаньне: 74% амэрыканцаў падтрымліваюць увядзеньне беспалётнай зоны над Украінай
Паводле апытаньня Reuters / Ipsos, праведзенага ў чацьвер і пятніцу, у ЗША расьце абурэньне ўварваньнем Расеі ва Ўкраіну, якое суправаджаецца бамбаваньнямі жылых раёнаў.
У Львове помнікі засьцерагаюць ад магчымага бамбаваньня
Пра гэта паведаміў дэпутат Вярхоўнай Рады Ўкраіны Аляксей Ганчарэнка.
Пуцін даў званьне «героя Расеі» афіцэру з Прымор’я за напад на Ўкраіну
Губэрнатар расейскага Прыморʼя Алег Кажамяка расказаў пра афіцэра, які атрымаў званьне «героя Расеі» за дзеяньні ў вайне супраць Украіны.
Указам Пуціна званьне «героя Расеі» прысвоена камандзіру брыгады марской пяхоты, палкоўніку Аляксею Бернгарду.
«Найвышэйшую воінскую ўзнагароду Аляксей атрымаў за ўмелыя дзеяньні пры выкананьні баявых задачаў у ходзе спэцыяльнай ваеннай апэрацыі на ўсходзе Ўкраіны», — напісаў губэрнатар.
Ці атрымаў палкоўнік гэтае званьне жывым або пасьмяротна, не ўладкладняюць.
Наступствы расейскага нападу на сяло Мархалёўка на Кіеўшчыне
Расейцы дзясяты дзень трымаюць пэрсанал Чарнобыльскай АЭС у закладніках
На станцыі дагэтуль застаюцца людзі, якія працавалі на Чарнобыльскай АЭС у першы дзень расейскага ўварваньня. Пра гэта паведаміў мэр Славуціча Юры Фамічоў у этэры «Суспільне», перадае Укрінформ.
«Мы ня можам замяніць людзей, яны 10 дзён адпрацоўваюць сваю зьмену. Іх падзялілі на дзьве групы, што зьмяняюць адна адну, але яны стаміліся маральна, фізычна, эмацыйна», — сказаў Фамічоў. Ён дадаў, што людзі ядуць эканомна, маюць абмежаваную колькасьць лекаў, і ім вельмі цяжка.
«Мы казалі, што кадры павінны працаваць стабільна. Акрамя таго, усе транспартныя сродкі, якія праяжджаюць праз Чарнобыльскую зону, развозяць радыеактыўны пыл на колах на ўсю тэрыторыю Ўкраіны далей у кірунку Кіева, і яна не спыняецца соднямі», — сказаў мэр.
Ён адзначыў, што зносіны з «тымі людзьмі абмежаваныя», няма гарантаванага «зялёнага калідору», які замяніў бы ўсю зьмену на станцыі.
«Акрамя таго, вібрацыя, якая ўзьнікае пры перамяшчэньні тэхнікі і, ня дай бог, калі ідуць баявыя дзеяньні, можа паўплываць і на 4-ы энэргаблёк, які мае няўстойлівыя канструкцыі. Маю на ўвазе той, які пацярпеў у аварыі ў 1986 годзе», — сказаў Фамічоў.
Паводле яго, абвал няўстойлівых канструкцыяў можа прывесьці да выкіду вялікай колькасьці радыяактыўнага пылу.
Украіна афіцыйна падала пазоў супраць Расеі ў Міжнародны суд ААН у Гаазе.
Таксама дзеяньні расейскіх агрэсараў пагражаюць Запароскай АЭС, у выпадку аварыі там экалягічныя праблемы адчуе і Беларусь.
ААН: Звыш 1,2 млн сталі ўцекачамі пасьля расейскага нападу на Ўкраіну
Управа Высокага камісара ў справах уцекачоў ААН таксама зьвяртае ўвагу, што многія іншыя ўкраінцы «пераяжджаюць унутры краіны», многія сем’і зьехалі ў поўным складзе.
S&P панізіла рэйтынг Беларусі
Рэйтынгавае агенцтва Standard & Poor’s у пятніцу панізіла доўгатэрміновы крэдытны рэйтынг Беларусі з «B» да «CCC». Гэта азначае, што, з гледзішча агенцтва, Беларусь адчувае значныя цяжкасьці з выплатамі ў даўгавых абавязаньнях.
«Міжнародныя санкцыі, уведзеныя супраць Беларусі празь яе ўдзел у расейскім ваенным уварваньні ва Ўкраіну, дастаткова жорсткія, і мы чакаем, што яны надалей будуць узмацняцца», — тлумачыць агенцтва, якое цытуе ВВС.
Кіеў: У Валынскай вобласьці затрымалі дэсантніка зь Беларусі
На Шацкім кірунку затрымалі беларускага вайскоўца. Пра гэта ў фэйсбуку паведаміў начальнік патрульнай паліцыі Яўген Жукаў.
«Людзей затрымлівалі, выклікалі памежнікаў. Ён кажа, што перайшоў на бок Украіны, бо ня хоча з намі ваяваць. Кажа пра пазыцыі, пра колькасьць войскаў на мяжы», — сказаў Жукаў.
Фота затрыманага начальнік патрульнай паліцыі паабяцаў выкласьці пазьней.