Украінская чыгунка эвакуавала з «гарачых пунктаў» больш за адзін мільён грамадзян
Ад пачатку новай ваеннай агрэсіі Расеі супраць Украіны чыгунка вывезла з-пад абстрэлаў у розных украінскіх гарадах больш за адзін мільён грамадзян, у тым ліку 58 тысяч іншаземцаў.
«Працэс эвакуацыі не спыняецца ні ўдзень, ні ўначы. Для перавязеньня грамадзян залучаны ўвесь наяўны рухомы склад на захадзе Ўкраіны», — паведамілі на прадпрыемстве «Укрзалізниця». У асноўным эвакуацыя ідзе з Харкава, Запарожжа і Кіева ў памежныя вобласьці на захадзе Ўкраіны.
Садзяць у цягнікі бясплатнай і ў парадку прыярытэтнасьці — спачатку дзеці, жанчыны, старыя людзі і толькі потым іншыя пасажыры.
Адначасова Ўкраіна патрабуе ад Расеі забясьпечыць гуманітарныя калідоры для эвакуацыі цывільнага насельніцтва зь іншых гарадоў, якія фактычна трапілі ў атачэньне — Марыюпалю, Херсону і іншых.
Напярэдадні пра калідоры дамовіліся на кансультацыях у Беларусі, але Расея гэтых дамоўленасьцяў не выконвае. Украінскія ўлады мусілі зьвярнуцца ў Міжнародны камітэт Чырвонага Крыжа па тэрміновую дапамогу ў стварэньні гуманітарных калідораў.
Дарадца Офісу прэзыдэнта Ўкраіны Міхайла Падаляк паведаміў, што цяпер канцлер Нямеччыны Оляф Шольц вядзе перамовы з Уладзімірам Пуціным аб стварэньні гуманітарных калідораў.
Генэральны штаб Украіны: на Данбасе падбілі расейскі штурмавік
Сусьветны банк спыніў усе праграмы ў Расеі і Беларусі
Сусьветны банк заявіў, што неадкладна спыняе ўсе праграмы ў Расеі і Беларусі пасьля расейскага ўварваньня ва Ўкраіну і „варожых дзеяньняў супраць народу Ўкраіны“.
Банк заявіў, што не ўхваляў новых крэдытаў Беларусі з 2020 году, калі ЗША увялі санкцыі супраць гэтай дзяржавы ў сувязі з спрэчнымі прэзыдэнцкімі выбарамі.
На сайце арганізацыі гаворыцца, што аб’ём крэдытных праграмаў Сусьветнага банку ў Беларусі ў 2020 годзе склаў 308 мільёнаў даляраў. Актыўныя праекты ўключаюць праект выкарыстаньня біямасы для ацяпленьня, работы ў галіне разьвіцьця лясной гаспадаркі і мадэрнізацыю сыстэмы адукацыі.
У палон Украіне здаўся капітан, які ў 2014 годзе ў часе анэксіі Крыму перайшоў на бок Расеі
Служба бясьпекі Ўкраіны паведаміла, што ў Кахоўцы Херсонскай вобласьці ў палон здаўся былы ўкраінскі вайсковец, які ў 2014 годзе ў часе анэксіі Расеяй Крыму здрадзіў прысязе і перайшоў на расейскі бок.
Капітан Ігар Рудэнка паведаміў, што 24 лютага яго гаўбічна-артылерыйскі дывізіён атрымаў загад наступаць на Ўкраіну, высунуўся на Новую Кахоўку ў Херсонскай вобласьці, а потым мусіў ісьці на Мікалаеў і Адэсу.
На допыце ён паведаміў, што ягонае камандаваньне запэўніла, быццам з украінскай уладай пра ўсё дамоўлена, і яны, не абстрэльваючы мірных жыхароў, мусілі проста прайсьці рэйдам.
Паводле яго, у Кахоўцы супраць іх выйшлі простыя сяляне, і таму ён вырашыў скласьці зброю і здацца ў палон.
Пасьля допыту яму дазволілі зьвязацца з жонкай, якую ён папрасіў перадаць камандаваньню, што зь ім у палоне знаходзяцца яшчэ 11 вайскоўцаў, у тым ліку маёр.
Што такое «генацыд» і чаму на Данбасе яго няма
А таксама што ня так з фразай «Дзе вы былі 8 гадоў?», што такое «народ Данбасу» і чыё ўмяшаньне разьвязала вайну ў рэгіёне. Тлумачым.
Пасьля захопу Херсона ў горадзе адключылі ўкраінскіх апэратараў і трансьлююць расейскія каналы
Херсонская абласная дзяржаўная адміністрацыя паведаміла, што пасьля ўваходу расейскіх войскаў у Херсон ва ўсім рэгіёне адключылі паслугі двух украінскіх мабільных апэратараў і пачалі трансьляваць прапагандысцкую расейскую телевізію. Абласныя ўлады таксама паведамілі са спасылкай на Службу бясьпекі Ўкраіны, што расейскія войскі завезьлі ў Херсон 60-80 жыхароў Крыму, якіх пасялілі ў адным зь мясцовых гатэляў.
«Пэўна, сёньня цягам дня яны пад выглядам мясцовых жыхароў выйдуць на правакацыйную акцыю на цэнтральныя плошчы — з расейскімі сьцягамі і з „удзячнасьцю расейскім вызваліцелям“. Таксама маем інфармацыю, што акупанты захапілі склад з формай воднай паліцыі. І на мітынг могуць выйсьці пераапранутыя расейскія вайскоўцы, якія ў форме ўкраінскіх паліцыянтаў таксама будуць „дзякаваць“ захопнікам», — паведамілі ў Харкаўскай абласной дзяржаўнай адміністрацыі.
Улады пераконваюць, што гэтыя мітынгі ня маюць нічога супольнага з рэальнымі настроямі мясцовых жыхароў, якія займаюць праўкраінскую пазыцыю. «Такія акцыі зьяўляюцца часткай інфармацыйнай вайны, як фэйкі і дэзынфармацыя», — заявілі мясцовыя ўлады.
Кіеў узмацняе сваю абарону: блёк-пасты на ўезьдзе і выезьдзе, абмежавальныя блёкі і «вожыкі» на дарогах
У Кіеве цягам мінулай ночы некалькі разоў працавалі сыстэмы супрацьпаветранай абароны ў адказ на спробы расейскіх войскаў абстраляць украінскую сталіцу.
«Ноч прайшла адносна спакойна. Некалькі разоў спрацавалі сыстэмы СПА. Горад жыве ў ваенным становішчы. Машыны рухаюцца, працуюць прадуктовыя крамы і большасьць камунальных аптэк», – паведаміў мэр Кіева Віталь Клічко ў сваім звароце да жыхароў сталіцы.
Паводле яго, у сталіцы для праезду зь левага на правы бераг Дняпра з чатырох мастоў працуюць толькі два, іншыя перакрытыя ў мэтах бясьпекі.
У той жа час улады просяць грамадзян не выяжджаць у горад, калі для гэтага няма крайняй патрэбы. «Для ўласнай бясьпекі. І не ігнаруйце сыгналу трывогі. Адразу бяжыце ў сховішча».
Мясцовыя ўлады пераконваюць, што ўсе кіеўскія лякарні забясьпечаны неабходнымі мэдыкамэнтамі, а лекары знаходзяцца на баявым дзяжурстве.
У Кіеве за апошнія 8 дзён нарадзіліся 390 дзяцей, у тым ліку 199 хлопчыкаў і 191 дзяўчынка.
«Трымаемся і дапамагаем, чым можам, людзям, якія побач. Трымаем Кіеў. Разам яго адстаім», – заявіў Віталь Клічко.
Якія СМІ ў Расеі сутыкнуліся з абмежаваньнямі пасьля пачатку вайны з Украінай
24 лютага «Роскомнадзор» запатрабаваў ад СМІ публікаваць аб вайне з Украінай толькі «зьвесткі з афіцыйных расейскіх крыніц» і прыгразіў штрафамі да 5 млн расейскіх рублёў і блякаваньнем.
26 лютага ведамства запатрабавала выдаліць публікацыі аб вайне ва Ўкраіне ад «Эха Москвы», «ИноСМИ», «Медиазоны», New Times, «Дождя», «Свободной прессы», «Крым.Реалий», «Новой газеты», «Журналиста», «Лениздата». Журналістам забаранілі называць «расейскую спэцапэрацыю» нападам, уварваньнем альбо абвяшчэньнем вайны.
З моманту пачатку вайны былі заблякаваныя:
- «Настоящее время»
- «Крым.Реалии»
- New Times
- «Тайга.Инфо»
- DOXA
- «Эхо Москвы»
- «Дождь»
- «Медуза»
- Расейская служба BBC
- Радио Свобода
- «Голос Америки»
- Deutsche Welle
- Томское агентство ТВ2
- «Интерфакс. Украина»
- «Гордон»
- «Корреспондент»
- «Украинская правда»
- ТСН
- «Сегодня»
- «Укринформ»
- Zaxid
- «Зеркало недели»
- Сensor.net
- Vesti.ua
- Depo.ua
- Delo.ua
Аб прыпыненьні сваёй працы паведамілі:
- «Дождь»
- Znak.com
- DOXA (часткова прыпыніў працу рэдакцыі)
Аб спыненьні працы заявілі:
Томскае агенцтва ТВ2
Абмежаваная праца:
- TikTok
Аб закрыцьці абвесьціў таксама расейскі офіс The Village. Рэдакцыя працягне працаваць з Варшавы, гаворыцца ў заяве.
У Запароскай абласной вайсковай адміністрацыі расказалі, што адбываецца на ЗАЭС і чаго хочуць вайскоўцы Расеі
Па дадзеных экспэртаў Запароскай АВА, падзеі на Запароскай АЭС могуць сьведчыць, што расейскія вайскоўцы хочуць парушыць працу энэргасыстэмы ўсёй Украіны.
Пра гэта ў сваім відэазвароце паведаміў кіраўнік АВА Аляксандар Старух.
«Вораг спрабуе дэмаралізаваць нас, калі пачынае страляць па блёках АЭС. Гэта практычна паказвае нейкі ўзровень „неадэкватнасьці“ людзей. Але разам з тым сытуацыя лякалізаваная. Узьніклы пажар лякалізаваны нашымі падразьдзяленьнямі ДСНС. Адбыўся бой. Атамная станцыя пад кантролем расейскіх вайскоўцаў, якія нясуць адказнасьць за яе цяпер. Працуе 1 блёк АЭС, 2 — пад парамі. Сытуацыя ў ядзернай бясьпецы стабільная, бо своечасова адключылі адпаведны рэжым функцыянаваньня блёкаў. Згарэў найлепшы ў сьвеце навучальны цэнтар. Стралялі таксама ў адміністрацыйны будынак і корпус АЭС», — сказаў чыноўнік.
Аляксандр Старух таксама дадаў: «Цяпер станцыя працуе стабільна. Будуць глядзець, наколькі трэба 1 або 2 блёкі дадаваць у агульную электрасетку. Нашы экспэрты гавораць, што такія дзеяньні накіраваны на завал функцыянаваньня ўсёй электрасыстэмы краіны. Сытуацыя нядобрая ў тым, што людзі не жадаюць працаваць пад рулямі аўтаматаў. Значная колькасьць энэргадарцаў хоча пакінуць горад. Гэта можа прывесьці да таго, што будзе цяжка забясьпечыць функцыянаваньне атамнай электрастанцыі».
У цяперашні час «Енергоатом» паведамляе аб верагодным захопе ў палон мэра Энэргадара, побач з якім разьмешчана АЭС.
«Горад жыве ў рэжыме супрацьстаяньня зь „ветлівымі зялёнымі людзьмі“. Зварот гарадзкога галавы пра тое, што „ўсё добра“, хутчэй за ўсё, запісаны пад прымусам акупантаў. Аднак усё нядобра. Жыхары горада ноччу заварвалі і іншымі спосабамі надзейна зачынялі дзьверы ў пад’езды, каб расейцы ня мелі магчымасьці ўварвацца ў дамы і на верхнія паверхі дамоў, якія хочуць выкарыстоўваць як баявыя пазыцыі», — гаворыцца ў паведамленьні афіцыйнага каналу «Енергоатома».
Генштаб Узброеных сіл Украіны пра страты Расеі: 70 самалётаў і верталётаў
Генэральны штаб Узброеных сіл Украіны паведаміў, што з пачатку агрэсіі Расеі ва Ўкраіне ўкраінскія войскі зьнішчылі 9 166 расейскіх вайскоўцаў.
Паводле папярэдніх зьвестак, зьнішчылі 33 самалёты і 37 верталётаў, а таксама 251 танк, 939 баявых браняваных машын, 105 артылерыйскіх сыстэм, 50 – ракетных сыстэм залпавага агню, 18 сродкаў супрацьпаветранай абароны, 404 вайсковыя аўтамабілі, 2 лёгкія катэры, 60 цыстэрнаў з палівам і тры бесьпілётнікі.
«Зьвесткі ўдакладняюцца, бо падлік ускладняецца высокай інтэнсіўнасьцю баявых дзеяньняў».
У той жа час страты ўкраінскага войска не паведамляюць. Вядома, што колькасьць ахвяр сярод цывільнага насельніцтва Ўкраіны перавысіла 2 тысячы асобаў.
У Расеі прызналі толькі каля 500 сваіх забітых на вайне супраць Украіны.
У Чарнігаве ад бамбаваньня расейскай авіяцыяй загінулі 47 чалавек
Сярод загінулых 38 мужчын і 9 жанчын. Пра гэта гаворыцца ў паведамленні абласной адміністрацыі.
Украіна заклікала Чырвоны Крыж спрыяць стварэньню гуманітарных калідораў
Украіна зьвярнулася ў Міжнародны камітэт Чырвонага Крыжа тэрмінова дапамагчы ў стварэньні гуманітарных калідораў. Пра гэта паведаміў Офіс прэзыдэнта Ўкраіны.
У сваім звароце да ўкраінцаў Уладзімір Зяленскі заявіў, што працяг абстрэлаў украінскіх гарадоў з боку расейскай арміі сьведчыць пра тое, што Расея не выконвае дасягнутых у Беларусі дамоўленасьцяў.
У выніку абстрэлу ў Жытоміры разбурана школа
Раніцай у Жытоміры пры абстрэле разбураны будынак школы, паведаміла Дзяржслужба надзвычайных сытуацый.
«У 09:35 паступіла інфармацыя, што ў Жытоміры ў выніку абстрэлу і пападаньня боепрыпасу ў будынак школы на вуліцы Малая Бярдзічаўская адбылося разбурэньне ў будынку без наступнага гарэньня. Папярэдне ахвяр і пацярпелых няма. Эвакуавалі 5 чалавек», — гаворыцца ў паведамленьні.
1 сакавіка, у Жытоміры, на жылым масіве Багунія, прагрымеў авіяўдар. Па дадзеных мэрыі, было пашкоджана 10 жылых дамоў, 2 мэдустановы, 3 крамы. Улады паведамлялі аб ахвярах сярод насельніцтва.
Зяленскі: Мінулая ноч магла спыніць гісторыю Ўкраіны і ўсёй Эўропы
Прэзыдэнт Украіны Ўладзімір Зяленскі лічыць, што абстрэлы расейскімі войскамі Запароскай АЭС маглі прывесьці да ўсясьветнай трагедыі.
«Мы перажылі ноч, яка магла спыніць гісторыю Ўкраіны і гісторыю Эўропы. Расейскія войскі атакавалі Запароскую атамную электрастанцыю, найбольшую ў Эўропе. Яна адна магла быць як шэсьць Чарнобыляў», – заявіў Уладзімір Зяленскі ў сваім звароце да ўкраінцаў.
Генэральная пракуратура Беларусі завяла яшчэ адну справу супраць Ціханоўскай
Генэральная пракуратура Беларусі паведаміла, што завяла новую крымінальную справу супраць Сьвятланы Ціханоўскай за «заклікі да санкцый і іншых дзеяньняў, накіраваных да прычыненьня шкоды нацыянальнай бясьпецы Беларусі».
Беларусы стварылі плятформу для ўкраінскіх уцекачоў па пошуку жыльля
Каманда ІТ-спэцыялістаў зь Беларусі распрацавала плятформу па пошуку жыльля для ўкраінцаў, якія ўцякаюць ад вайны — icanhelp.host.
Незалежны расейскі сайт Znak.com прыпыніў працу
Рашэньне прынятае «ў сувязі зь вялікай колькасьцю абмежаваньняў, якія зьявіліся ў апошні час для працы СМІ ў Расеі». У рэдакцыі ня могуць працаваць так, як хоча «Роскомнадзор», і ня хочуць чакаць, пакуль іх заблякуюць.
Раней закрыліся радыё «Эхо Москвы» і тэлеканал «Дождь».
Расея звозіць на поўдзень Украіны жыхароў Крыму, каб паказаць, што яе дзеяньні нібыта падтрымлівабць мясцовыя жыхары
Дарадца Міністэрства ўнутраных спраў Украіны Вадзім Дзянісенка заяўляе пра шматлікія спробы Расеі выкарыстаць жыхароў з акупаваных тэрыторый Крыму і Данбасу для стварэньня прапагандысцкіх паведамленьняў аб тым, што на поўдні Ўкраіны з радасьцю сустракаюць расейскія войскі і просяць далучыць рэгіёны да Расеі.
«Напрыклад, учора (3 сакавіка) у Мелітопаль прывезьлі невялікую машын з прадуктамі харчаваньня, стварылі каля яе чаргу ў колькасьць 50-60 і фатаграфавалі, як «шчасьлівыя» нібыта жыхары Мелітопаля, а насамрэч – Крыму, дзякуюць «русскому миру» за тое, што ўратавалі ад украінскай хунты», – паведаміў Вадзім Дзянісенка.
Паводле яго, аналягічная сытуацыя зараз назіраецца ў Херсоне і іншых гарадах Украіны. «Расейцы не змаглі знайсьці сярод украінцаў здраднікаў, якія прыходзяць за таннай каўбасой і якія просяць у расейцаў троху паесьці, і за гэта шчасьліва ўсьміхаюцца. Таму яны вымушаныя і цяпер прывозяць вось гэтых пераапранутых, якія паказваюць, што яны нібыта ўкраінцы. Гэта хлусьня, і пра гэта будзе ведаць увесь сьвет».
Зьявіўся сайт «Застанься дома» для беларускіх вайскоўцаў
Аўтары сайту тлумачаць беларускім вайскоўцам неабходнасьць застацца ў Беларусі і не ваяваць за расейскія інтарэсы супраць незалежнасьці Ўкраіны.
Міністэрства абароны Ўкраіны: за восем дзён вайны страты расейцаў перавысілі 10 тысяч чалавек
Міністар абароны Ўкраіны Аляксей Рэзьнікаў лічыць, што сёньня і наступныя дні будуць пераломныя ў вайне з Расеяй.
Паводле яго, змагаюцца Чарнігаў, Сумы і Харкаў. На некаторых кірунках Узброеныя сілы Ўкраіны ажыцьцявілі пасьпяховы контранаступ.
«Складанай застаецца сытуацыя на поўдні, дзе вораг у апошнія гадзіны абстрэльваў Запароскую АЭС. Але баявы дух людзей у казацкім краі такі, што акупанты асуджаныя на паразу», – заявіў Аляксей Рэзьнікаў у сваім звароце да ўкраінцаў.
Міністар абароны Ўкраіны паведаміў, што за 8 дзён вайны зьнішчана больш як 10 тысяч расейскіх вайскоўцаў. «Пацьверджана зьнішчэньне мінімум аднаго расейскага генэрала. Расейскае грамадзтва пачынае адчуваць і ўсьведамляць гэтыя страты».
Аляксей Рэзьнікаў дадаў, што і ўкраінскае войска мае страты, але іх не дэталізаваў.
Расея напярэдадні прызнала страту на вайне ва Ўкраіне 498 сваіх вайскоўцаў і яшчэ 1597 параненых.