Мэр Херсону: «Горад па-ранейшаму Ўкраіна».
Ва ўкраінскім Херсоне, на ўездах да якога расейскія вайскоўцы выставілі блёк-пасты, абстаноўка спакойная, ноччу горад не абстрэльвалі. Пра гэта напісаў у фэйсбуку мэр гораду Ігар Калыхаеў.
Напярэдадні Калыхаеў паведамляў, што на ўездах у Херсон войска РФ паставіла блёк-пасты. «Цяжка сказаць, як будзе разьвівацца сытуацыя далей», — пісаў мэр.
Вядомы ўкраінскі тэатар адмовіўся слова «рускі» ў сваёй назве
«У гэтыя неспакойныя дні ня можа быць двух розных пунктаў гледжаньня на тое, што сёньня адбываецца ва Ўкраіне. Ня можа быць двух розных пунктаў гледжаньня і наконт афіцыйнага афармленьня рашэньня аб зьмене назвы Нацыянальнага акадэмічнага тэатра рускай драматургіі імя Лесі Ўкраінкі, які даўно высьпеў у калектыве тэатру», – адзначаецца ў звароце.
Цяпер гэты тэатар будзе называцца Нацыянальным акадэмічным тэатрам імя Лесі Ўкраінкі, адмовіўшыся ад назвы «рускай драматургіі», якую мелі ў сваёй стогадовай гісторыі.
Кіеў блякаваў уезды ў горад, ноччу ішлі вулічныя баі
Кіеўская гарадзкая адміністрацыя паведаміла, што ноч на 1 сакавіка, нягледзячы на неаднаразовае абвяшчэньне паветранай трывогі, прайшла спакойна, але з вулічнымі баямі.
«Гарадзкія службы ствараюць абаронныя збудаваньні на ўездах у сталіцу. Гарадзкая інфраструктура працуе, падаецца электрычнасьць, цяпло і вада. Лекары працуюць ва ўзмоцненым рэжыме і забясьпечаныя ўсім неабходным», – адзначаецца ў паведамленьні.
У Кіеве стварылі гуманітарны штаб, які зьбірае харчы і тавары першай неабходнасьці.
У Марыюпалі працягваецца страляніна
Як паведамляе праект Радыё Свабода «Новини Приазов’я», у горадзе няма інтэрнэту. Тэхніка страляе зь лініі жылых раёнаў, страляніна не прыпыняецца. Увечары 28 лютага ў частцы гораду зьніклі газавае забесьпячэньне і электрычнасьць. Мясцовая тэрытарыяльная абарона не выключае, што ў гэтыя дні расейскія войскі пачнуць «глушыць сувязь, інтэрнэт і тэлебачаньне ў прыфрантавой зоне».
Яшчэ адзін снарад трапіў у жылы дом у Харкаве
Другі дзень Харкаў застаецца мішэньню расейскіх ракетных атак, ёсьць забітыя і параненыя, моцныя разбурэньні.
Ці быў бунт расейцаў?
Як паведамляе адэскі сайт «Думская», расейскія марскія пехацінцы на тэрміновай службе зладзілі бунт на караблі і адмовіліся высадзіцца ў Адэсе. Выданьне спасылаецца на размовы сваіх карэспандэнтаў са сваякамі вайскоўцаў 810-й брыгады РФ, што дысьлякуецца ў акупаваным Крыме. З расейскага боку і афіцыйных крыніц пацьверджаньня няма.
Расейскія войскі штурмуюць Херсон, горад аточаны, але не здаецца
У ноч на 1 сакавіка расейскія войскі пачалі штурмаваць Херсон. Мэр горада заклікаў жыхароў не выходзіць на вуліцы, каб тэрытарыяльная абарона і ўкраінскія войскі маглі бесьперашкодна зьнішчаць агрэсара і ня ставіць у небясьпеку мірных жыхароў.
«Я прашу кожнага з вас захоўваць спакой і разважлівасьць. Не выходзьце на вуліцы ў камэнданцкі час. Не пачынайце ні з кім агрэсіўных перамоў і не правакуйце супраціўніка на канфлікты. Найбольшая каштоўнасьць – гэта вашы жыцьці. Херсон утрымаецца. Але дайце яму шанц гэта зрабіць», – зьвярнуўся мэр гораду Ігар Калыхаеў уночы да гараджан.
У сваю чаргу кіраўнік Херсонскай абласной адміністрацыі Генадзь Лагута паведаміў, што «акупанты заходзяць на тэрыторыю горада, захопліваюць мясцовых у палон. Магчыма, іх будуць выкарыстоўваць як жывы шчыт для прасоўваньня наперад», – паведаміў Генадзь Лагута.
У той жа час ён падкрэсьліў, што горад не захоплены, ён абложаны акупацыйнымі войскамі.
Першая інфармацыя пра пацярпелых ад абстрэлаў Харкава
У выніку абстрэлу будынка Харкаўскай аблдзяржадміністрацыі пацярпелі 6 чалавек, у тым ліку 1 дзіця. Колькасць загінулых высьвятляецца, паведамляе МНС Украіны. Пажар на даху опэрнага тэатру зьліквідавалі.
Пад Кіевам абстралялі рэабілітацыйны цэнтар для вэтэранаў
Міністарка Ўкраіны ў справах вэтэранаў Юлія Лапуціна заявіла аб абстрэле расейскімі войскамі рэабілітацыйнага цэнтру для вайскоўцаў у паселішчы Барадзянка Кіеўскай вобласьці.
«Гэта акт парушэньня міжнароднага гуманітарнага права, акт гвалту, які будзе пакараны. Я ганаруся супрацоўнікамі нашага рэабілітацыйнага цэнтру, якія ў такой складанай ваеннай сытуацыі працягваюць выконваць свае абавязкі», – сказала міністар. Але яна не ўдакладніла маштабу руйнаваньня.
Масква за ўвесь час абстрэлаў не прызнае, што вядзе абстрэл па цывільных і мэдычных аб’ектах.
Сродкі супрацьпаветранай абароны Беларусі ў гатоўнасьці
На паседжаньні Савету бясьпекі ў Менску заявілі, што «ў Беларусі прыведзены ў гатоўнасьць сродкі СПА, каб «не дапусьціць удараў у сьпіну расейскім войскам».
Міністар абароны Ўкраіны пра абстрэлы мірных грамадзян: «Яны ня здольныя ваяваць з узброенымі ўкраінцамі»
«Барбарскія абстрэлы ракетамі і РСЗ мірных гарадоў – гэта сьведчаньне, што яны няздольныя больш ваяваць з узброенымі ўкраінцамі. Толькі зь мірнымі, як апошнія баязьліўцы», – напісаў міністар абароны Ўкраіны Аляксей Рэзьнікаў, камэнтуючы масавыя абстрэлы Харкава і іншых украінскіх гарадоў.
Ён назваў такія дзеяньні Расеі ваеннымі злачынствамі, якія стануць прадметам разбору ў трыбунале:
«Будзе справядліва, калі спэцыяльны міжнародны трыбунал будзе створаны ў Харкаве. Дарэчы, менавіта ў Харкаве ў 1943 годзе адбыўся першы працэс, у выніку якога нацыстаў асудзілі за ваенныя злачынствы», – перакананы міністар абароны Ўкраіны Аляксей Рэзьнікаў.
Уначы расейскія войскі абстралялі Марыюпаль і суседнюю вёску Стары Крым
У цяперашні час баі ідуць на ўскраінах Марыюпалю. Няма цяпла, у частцы горада — электрычнасьці, перабоі з мабільнай сувязьзю, паведаміла журналістка «Громадського» радыё.
Жывы эфір Радыё Свабода і «Настоящего времени» пра вайну Расеі супраць Украіны
Белы дом: «Санкцыі супраць Расеі ў энэргетычным сэктары абмяркоўваюцца»
Прэс-сакратарка Белага дому сказала, што ЗША працуюць над тым, каб паскорыць пастаўкі ва Ўкраіну ў рамках апошняга пакету дапамогі, зацьверджанага Байдэнам.
У Менску за ўдзел у антываенных акцыях 28 лютага затрымалі больш за 60 чалавек
У панядзелак адбыліся суды над тымі, каго затрымалі ў дзень рэфэрэндуму. «Суткі» атрымалі 63 чалавекі, у сярэднім кожнага затрыманага арыштавалі на 10−15 дзён, некалькі чалавек атрымалі 30 дзён арышту кожны. Штрафы па 200 базавых атрымалі 2 чалавекі, піша «Вясна».
Антываеная акцыя ў Менску
У адным зь менскіх падземных пераходаў скрыпач граў гімн Украіны.
Ад авіянападу на казарму ў Ахтырцы загінула каля 70 чалавек
1 сакавіка пачаўся разбор завалаў разбуранай 28 лютага 2022 году авіяўдарам вайсковай казармы ў горадзе Ахтырка Сумскай вобласці Ўкраіны, у выніку дзе загінулі каля 70 чалавек.
Расейцы працягнулі абстрэлы Харкава. ВІДЭА
Дарадца міністра ўнутраных спраў Украіны Антон Герашчанка апублікаваў у сваім тэлеграм-канале відэа абстрэлу цэнтру Харкава. Ён прынёс аднаму з найбуйнейшых гарадоў краіны чарговыя разбурэньні.
ААН: За чатыры дні вайны, якую вядзе Расея супраць Украіны, загінулі больш за 100 цывільных
442 тысячы ўкраінцаў пакінулі сваю краіну як уцекачы ад вайны. У выніку нападу Расеі на Ўкраіну, паводле зьвестак ААН, загінулі больш за 100 мірных жыхароў і больш за 300 былі параненыя. Пра гэта ўвечары 28 лютага ў Жэневе паведаміла вярхоўны камісар ААН у правах чалавека Мішэль Башэле. Паводле яе, сярод пацярпелых ня менш як сямёра дзяцей. Большасьць ахвяраў выклікалі артылерыйскі і ракетны абстрэлы, а таксама авіяцыйныя абстрэлы, гаворыцца ў заяве Вярхоўнага камісара ААН.
Кіеў: расейскія войскі за 28 лютага страцілі па 5 самалётаў і зьнішчальнікаў, верталёт і крылатую ракету
Камандаваньне ВПС Узброеных сіл Украіны паведаміла аб стратах, якія панесьлі расейскія вайскоўцы за мінулыя суткі. Паводле статыстыкі ўкраінцаў, пяць самалётаў праціўнік страціў пад Васільковам і Браварамі. Да стратаў прывялі ўдалыя дзеяньні ўкраінскіх лётчыкаў-зьнішчальнікаў і зэнітных ракетных дывізіёнаў С-300. Каля Кіева сілы абароны зьбілі крылатую ракету і верталёт расейцаў з дапамогай устаноўкі Бук М-1.
Таксама ўкраінцы наносілі зьнішчальныя ўдары на танкавых калёнах, калёнах мэханізаванай тэхнікі, маторных калёнах з гаруча-змазачнымі матэрыяламі.