Прэс-сакратарка Белага дома Джэн Псакі на брыфінгу заявіла, што «Злучаныя Штаты зьяўляюцца найбуйнейшым пастаўшчыком дапамогі Ўкраіне, і прэзыдэнт Байдэн за апошні год даставіў Украіне больш дапамогі ў галіне бясьпекі, чым хто-небудзь у гісторыі ЗША». Псакі цытуе «Голас Амэрыкі».
«Мы чакаем, што абсталяваньне з гэтага пакету пачне паступаць цягам наступных некалькіх дзён. Такім чынам, агульны кошт сыстэм бясьпекі, ухваленых намі для Ўкраіны, за апошні год склаў 1 мільярд даляраў», — падкрэсьліла Псакі.
Па словах прадстаўніцы Белага дома, ЗША пакуль яшчэ не ўвялі санкцый супраць энэргетычнага рынку Расеі, але такая магчымасьць разглядаецца.
«Мы не зрабілі ніякіх крокаў у пытаньні санкцый у энэргетычным сэктары, у асноўным таму, што ўзважваем такі крок. Гэта ня значыць, што ён не абмяркоўваюцца. Разглядаецца, але эўрапейцы, напрыклад, вельмі занепакоеныя далейшым скачком цэнаў. Так, цэны вырасьлі на 335% за апошні год і на 26% — за апошнія пяць дзён, — адзначыла Псакі. — Нам трэба ўзважыць усе фактары, калі мы разглядаем магчымасьць прыняцьця дадатковых крокаў».
Прэс-сакратарка Белага дому таксама заявіла, што ЗША не плянуюць аб’яўляць паветраную прастору Ўкраіны беспалётнай зонай.
«Прэзыдэнт Байдэн даў зразумець, што не зьбіраецца пасылаць войскі ЗША для вядзеньня вайны з Расеяй. Для стварэньня забароненай для палётаў зоны спатрэбіцца разгортваньне Ўзброеных сіл ЗША для забесьпячэньня яе захаваньня, што будзе патэнцыйна прамым канфліктам і патэнцыйнай вайной з Расеяй, часткай чаго мы ня хочам быць», — заявіла Джэйн Псакі.
У Белым доме таксама пракамэнтавалі загад расейскага прэзыдэнта аб прывядзеньні ядзерных сіл РФ у рэжым спэцыяльнага нясеньня баявога дзяжурства.
«Мы лічым, што падобная правакацыйная рыторыка ў дачыненьні ядзернай зброі небясьпечная, павялічвае рызыку праліку, яе варта пазьбягаць, і мы ня будзем зь ёй пагаджацца. Мы аналізуем загад прэзыдэнта Пуціна і ў цяперашні час ня бачым прычын для зьмены нашых уласных узроўняў гатоўнасьці ядзерных сіл. Важна памятаць, што на працягу апошніх некалькіх месяцаў і гадоў, калі ў нас былі сур’ёзныя рознагалосьсі з Расеяй па цэлым шэрагу пытаньняў, Расея і ЗША даўно пагадзіліся з тым, што прымяненьне ядзернай зброі будзе мець разбуральныя наступствы, і шмат разоў заяўлялі, у тым ліку сёлета, што ядзерную вайну нельга выйграць і яе ніколі нельга весьці».
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
