Генэральная пракурорка Ўкраіны Ірына Венядзіктава заявіла, што 26 лютага расейскія дывэрсанты расстралялі ў Кіеве сям’ю з чатырох чалавек: «загінулі бацькі і адна з дачок, якая вучылася ў 4-й клясе», а таксама ў абстрэле машыны хуткай дапамогі ў Херсонскай вобласьці.
Венядзіктава зьвярнулася да расейцаў:
«Вашы ракеты б’юць па жылых раёнах і населеных пунктах. Гінуць і атрымліваюць цяжкія раненьні дзеці, людзі пажылога веку і жанчыны.
Узброеныя сілы РФ сыстэматычна дэманструюць грэблівае стаўленьне да законаў і звычаяў вядзеньня вайны, яны ўвесь час зьдзяйсьняюць напады на абʼекты цывільнай інфраструктуры, якія знаходзяцца пад абаронай міжнароднага гуманітарнага права.
Войскі агрэсара нанесьлі сотні ўдараў крылатымі і балістычнымі ракетамі па цывільным насельніцтве. Дзясяткі такіх удараў былі накіраваныя на дзіцячыя сады і школы, лякарні, дзе знаходзіліся самыя маленькія ўкраінцы.
Толькі за сёньняшнюю ноч захопніцкія войскі РФ нанесьлі ўдары па абʼектах цывільнай і крытычнай інфраструктуры, сярод якіх:
- нафтабаза ў Васількове;
- газаправод у Харкаве;
- сховішча ядзерных адкідаў у Кіеве.
Усе гэтыя абʼекты не былі законнымі ваеннымі мэтамі з пункту гледжаньня міжнароднага гуманітарнага права. Ад удараў па гэтых абʼектах у першую чаргу цярпіць цывільнае насельніцтва».
Венядзіктава дадала:
«Вы пры ўсіх намаганьнях вашай прапаганды, якая залівае вам мазгі і сэрцы, не прадставіце мяне, якая да 40 гадоў жыла ў расейскамоўным Харкаве з прозьвішчам Венядзіктава, радыкалкай. А нацыяналісты — мы ўсе. Нацыяналісты — украінцы ад Керчы, Данецку і да Львова, Ужгараду і Цярнопаля. Нацыяналісты — гэта тыя, хто любіць сваю радзіму».
Яна заклікала расейскіх грамадзян дапамагчы спыніць вайну ва Ўкраіне:
«Грамадзяне Расеі, калі вы ня спыніце гэтую вайну — вы саўдзельнікі і памагатыя самых цяжкіх ваенных злачынстваў. Трэмінаў даўнасьці па іх няма. Аплочваць іх будуць цяперашнія і наступныя пакаленьні расейцаў», — заявіла Ірына Венэдыктава ў сваім звароце да расейскіх грамадзян.
Яна зьвярнулася і да Пуціна:
«Грамадзянін Пуцін. Звычайна я не называю прозьвішчаў і паважаю прэзумпцыю невінаватасьці. Але ня ў вашым выпадку. Мы дакажам у справядлівым судзе, што вы забойца і галоўны ваенны злачынец ХХІ стагодзьдзя. Гэта я вам афіцыйна заяўляю. Як генэральны пракурор сувэрэннай дзяржавы Ўкраіны ў сваіх межах, а ня ў вашых. Як магчымы будучы галоўны дзяржаўны абвінаваўца ў міжнародным судзе».
Расстрэл сям’і ў Кіеве
Сакратар Кіеўскай рады Ўладзімір Бандарэнка раней паведаміў у Facebook пра страляніну з удзелам расейскіх дывэрсантаў ў горадзе Кіеве:
«Яе звалі Паліна. Яна вучылася ў 4-м клясе 24-й школы Кіева. Сёньня раніцай (26 лютага) яна і яе бацькі былі расстраляныя расейскай ДРГ», — напісаў Бандарэнка.
Напад Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
