Фігуранта так званай «справы Аўтуховіча» 60-гадовага Ўладзімера Гундара абвінавацілі паводле арт. 366 КК (Гвалт або пагроза ў адносінах да службовай асобы, якая выконвае службовыя абавязкі, або іншай асобы, якая выконвае грамадзянскі абавязак).
Трыма гадамі пазбаўленьня волі ў калёніі агульнага рэжыму баранавіцкага актывіста Гундара пакараў судзьдзя Сяргей Беразюк.
«Валодзя ўспрыняў прысуд годна. Нават верш прачытаў. Усьміхаўся, быў рады ўсім, хто прыйшоў яго падтрымаць», — расказала Свабодзе жонка палітвязьня Алена Гундар.
У залю, па словах Алены, пусьцілі ўсіх, хто хацеў трапіць на паседжаньне.
«Выглядаў нармальна, дзякуй Богу. Праўда, нязвыкла, ён жа ўсё жыцьцё з бародкай такой хадзіў, а цяпер паголены абсалютна», – кажа Алена.
Пасьля суду Алена з дачкой Уладзімера пайшлі пісаць заяву на спатканьне.
Суд быў закрытым
Закрыты суд над краязнаўцам Уладзімерам Гундарам пачаўся 12 траўня. Справа разглядалася 3 дні. Увесь гэты час родныя актывіста не маглі трапіць у судовую залю.
У першы дзень працэсу жонку Ўладзімера Гундара Алену сілавікі не пусьцілі нават да дзьвярэй залі, таму яна большасьць часу стаяла на вуліцы.
Паводле сьледзтва, 30 сьнежня (у гэты дзень Ўладзімеру Гундару з інваліднасьцю 2-й групы прад’явілі абвінавачаньне паводле арт. 289 Крымінальнага кодэксу «Акт тэрарызму». — РС) падчас ператрусу ў хаце Гундар нібыта пагражаў сьледчым і разьбіў свой мабільны тэлефон.
Па словах жонкі актывіста Алены, гэты эпізод вылучылі ў асобную справу. Пасьля чаго Гундару выставілі абвінавачаньне паводле арт. 366 КК (Гвалт або пагроза ў адносінах да службовай асобы, якая выконвае службовыя абавязкі, або іншай асобы, якая выконвае грамадзянскі абавязак).
Уладзімер Гундар некалькі гадоў таму перанёс складаную апэрацыю. Яму ампутавалі нагу, ён мае гіпэртанію і судзіннае захворваньне. Актывіст ужо шмат гадоў носіць пратэз, але падчас затрыманьня праваахоўнікі прымусілі яго зьняць. У турме Гундар вымушаны перасоўвацца на мыліцах.
Перад першым судовым паседжаньнем Алена Гундар сказала Свабодзе, што ёй зь вялікай цяжкасьцю ўдалося перадаць мужу неабходныя лекі. Іх некалькі дзён не хацелі прымаць, нягледзячы на тое, што Ўладзімер напісаў заяву. У выніку лекі ад Алены ўсё ж такі прынялі, але ня ўсе.
Баранавіцкі актывіст і краязнаўца Ўладзімер Гундар, як і іншыя фігуранты справы аб падрыхтоўцы тэракту Мікалаем Аўтуховічам і Вольгай Маёравай, некалькі месяцаў правеў у СІЗА КДБ. Аднак на пачатку красавіка яго перавялі ў Берасьцейскае СІЗА № 7. Адтуль праз свае нешматлікія лісты ён паведаміў жонцы, што менавіта ў Берасьці над ім адбудзецца суд паводле арт. 366 КК.
Нядаўна ў сваіх лістах Уладзімер Гундар напісаў, што сярод яго сукамэрнікаў няма палітычных вязьняў. У камэры Ўладзімер знаходзіцца з трыма крымінальнікамі. Два зь іх асуджаныя за забойства, трэці праходзіць па «наркатычным артыкуле».
Галоўнае пра «справу Аўтуховіча»
Пра затрыманьне «групы Аўтуховіча» дзяржаўныя СМІ расказалі ўвечары 8 сьнежня 2020 году. Паводле іх, за падпаламі дома міліцыянта ў Ваўкавыску і падрывам аўтамабіля супрацоўніка міліцыі ў Горадні стаіць групоўка, якой кіраваў ваўкавыскі прадпрымальнік і былы палітвязень Мікалай Аўтуховіч.
Спачатку Сьледчы камітэт распачаў крымінальную справу паводле ч. 2 арт. 218 КК «Наўмыснае пашкоджаньне маёмасьці, учыненае агульнанебясьпечным спосабам». Потым Генпракуратура перакваліфікавала яго на ч. 1 арт. 289 — «Акт тэрарызму», які прадугледжвае пазбаўленьне волі да 15 гадоў. Некаторым з абвінавачаных інкрымінавалі частку 3 гэтага ж артыкулу, паводле якой пагражала сьмяротнае пакараньне.
Частка 3 артыкулу 289 прадугледзваецца, калі акты тэрарызму «учыненыя арганізаванай групай, або з прымяненьнем аб’ектаў выкарыстаньня атамнай энэргіі, або з выкарыстаньнем радыяактыўных рэчываў або ядзерных матэрыялаў, моцнадзейных, таксычных хімічных або біялягічных рэчываў або спалучаныя з забойствам чалавека».
Разгляд «справы Аўтуховіча» цягнуўся 5 месяцаў. Працэс праходзіў у горадзенскай турме.
Падчас працэсу падсудныя неаднаразова заяўлялі пра ціск і катаваньні з боку сілавікоў і адміністрацыі турмы. Сярод іншага фігуранты заяўлялі, што справа супраць іх сфабрыкаваная.
Працэс вёў судзьдзя Максім Філатаў, які знаходзіцца пад санкцыямі Эўразьвязу. Ён вядомы тым, што асудзіў на 5 год зьняволеньня актывіста зь Бярозаўкі Вітольда Ашурка, які пазьней пры нявысьветленых абставінах загінуў у шклоўскай калёніі.
17 кастрычніка 2022 году Філатаў вынес выракі:
- Мікалаю Аўтуховічу — 25 гадоў зьняволеньня (першыя 5 гадоў у турме, 20 гадоў — у калёніі строгага рэжыму), штраф 1000 базавых велічынь і пазбаўленьне званьня прапаршчыка ў адстаўцы.
- Уладзімеру Гундару — 18 гадоў зьняволеньня ў калёніі ўзмоцненага рэжыму.
- Паўлу Саву — 20 гадоў калёніі ўзмоцненага рэжыму.
- Вользе Маёравай — 20 гадоў калёніі агульнага рэжыму.
- Віктару Сьнегуру — 19 гадоў калёніі строгага рэжыму.
- Галіне Дзербыш —20 гадоў калёніі агульнага рэжыму.
- Любові Разановіч — 15 гадоў калёніі агульнага рэжыму.
- Сяргею Разановічу — 16 гадоў калёніі ўзмоцненага рэжыму.
- Павал Разановіч — 16 гадоў калёніі ўзмоцненага рэжыму.
- Ірыне Мельхер — 17 гадоў калёніі агульнага рэжыму.
- Ірыне Гарачкінай — 6 год і 1 месяц калёніі агульнага рэжыму.
- Антону Мельхеру — 2,5 гады калёніі агульнага рэжыму.
