Усе дададзеныя 12 лютага 2021 году ў абноўлены сьпіс КДБ беларусы абвінавачваюцца паводле арт. 289 (акт тэрарызму) КК Беларусі. Усе яны адносяцца да «групы Аўтуховіча» і «групы Аліневіча». Гэта 5 жанчын і 12 мужчын. Ёсьць і цэлыя сем’і, піша Tut.by.
У сьпіс унесьлі тых, хто ўжо знаходзіцца пад вартай.
«Група Аўтуховіча»:
- Мікалай Аўтуховіч
- Павал Сава
- Артур Папок
- Ірына Гарачкіна
- Сяргей Разановіч
- Павал Разановіч
- Любоў Разановіч
- Ірына Мэльхер
- Антон Мэльхер
- Галіна Дзербыш
- Віктар Сьнегур
- Уладзімер Гундар
- Вольга Маёрава
«Група Аліневіча»:
- Ігар Аліневіч
- Зьміцер Дубоўскі
- Сяргей Раманаў
- Дзьмітры Разановіч
28 кастрычніка мінулага году каля ўкраінскай мяжы затрымалі групу анархістаў у складзе чатырох чалавек — Ігар Аліневіч, Зьміцер Дубоўскі, Зьміцер Разановіч, Сяргей Раманаў. У іх нібыта знайшлі дзьве адзінкі агнястрэльнай зброі з боепрыпасамі, баявую ручную гранату, траўматычны пісталет і патроны да яго, халодная зброя і балёнчыкі зь пярцовым газам, форму і заплечнікі вайсковага ўзору, палаткі, сапэрную рыдлёўку, сякеру, ліхтары, ноўтбукі і пляншэты, GPS-трэкеры, відэарэгістратары, фотакамэру і іншае.
У КДБ лічаць, што «група Аліневіча» пасьпела зрабіць у Мазыры падпал аддзелу ДАІ і падпаліць машыны ля будынка пракуратуры ў Салігорску.
Пра затрыманьне «групы Аўтуховіча», дзяржаўныя СМІ расказалі ўвечары 8 сьнежня, яны паведамілі, што за падпаламі дома міліцыянта ў Ваўкавыску і падрывам аўтамабіля супрацоўніка міліцыі ў Горадні стаіць групоўка, якой кіраваў ваўкавыскі прадпрымальнік і актывіст Мікалай Аўтуховіч.
Спачатку крымінальная справа была заведзеная Сьледчым камітэтам паводле ч. 2 арт. 218 КК «Наўмыснае пашкоджаньне маёмасьці, зьдзейсьненае агульнанебясьпечным спосабам». Потым Генпракуратура перакваліфікавала яго на ч. 1 арт. 289 «Акт тэрарызму».
У сьпісе ёсьць яшчэ два беларусы — Сьцяпан Пуціла, заснавальнік папулярнага тэлеграм-каналу, прызнанага экстрэмісцкім рашэньнем суду, і Раман Пратасевіч, які быў яго галоўным рэдактарам. Цяпер яны знаходзяцца ў міждзяржаўным вышуку, а дакумэнты на іх афіцыйны Менск падаў у польскую пракуратуру.
Пратасевіча і Пуцілу абвінавачваюць у арганізацыі масавых беспарадкаў і групавых дзеяньняў, што груба парушаюць грамадзкі парадак, — ст. 293, арт. 342, а таксама ў распальваньні сацыяльнай варожасьці (ч. 3 арт. 130) Крымінальнага кодэксу Беларусі.
Усе астатнія фігуранты пераліку — тэрарысты зь міжнародных сьпісаў.
