Лёндан і Вашынгтон нейкі час таму папярэдзілі прэзыдэнта Расеі Ўладзіміра Пуціна пра тое, што Масква «заплаціць высокую цану» ў выпадку, калі расейскія войскі пачнуць ўварваньне на тэрыторыю Ўкраіны. Пра гэта заявіў у інтэрвію газэце Sunday Times дырэктар Сакрэтнай выведнай службы Вялікабрытаніі, вядомай як MI6, Рычард Мур.
Краіны Захаду неаднаразова выказвалі занепакоенасьць у сувязі з нарошчваньнем Расеяй групоўкі ўзброеных сіл ля мяжы з Украінай і ў анэксаваным Крыме. На гэтым тыдні Масква абвясьціла пра завяршэньне вайсковых вучэньняў і адвод часткі войскаў.
Паводле Мура, «безадказныя» дзеяньні Расеі выклікаюць сур’ёзную трывогу, аднак у доўгатэрміновай пэрспэктыве Расея зьяўляецца слабеючай дзяржавай «з пункту гледжаньня эканомікі і геаграфіі». На думку кіраўніка MI6, Расея сутыкаецца з мноствам цяжкасьцяў, а нядаўнія пратэсты з прычыны арышту Аляксея Навальнага паказалі, што частка яе насельніцтва незадаволеная Ўладзімірам Пуціным.
Кіраўнік MI6, які ўзначаліў службу нядаўна (раней ён быў дыпляматам, займаючы, у прыватнасьці, пасада пасла ў Турцыі), таксама сказаў, што да гэтага часу адчувае гнеў ў сувязі з выкарыстаньнем хімічнай зброі ў Солсбэры — гаворка ідзе аб атручэньні Сяргея і Юліі Скрыпалёў, да якога меркавана датычныя супрацоўнікі расейскай вайсковай выведкі. Паводле яго, колькасьць ахвяраў магла быць вялікім (ад атручэньня «навічком» загінула адна грамадзянка Вялікабрытаніі). Ён згадаў і пра тое, што чэскія спэцслужбы падазраюць тых самых расейскіх агентаў у арганізацыі выбуху ў Чэхіі ў 2014 годзе.
Усё гэта, як і дзеяньні Расеі ва Ўкраіне, паводле Мура, прыкметы безадказных паводзінаў Расеі. Паводле кіраўніка MI6, каналы камунікацыі паміж Лёнданам, Вашынгтонам і Масквой адкрытыя і расейскія ўлады ведаюць, як заходнія саюзьнікі ацэньваюць дзеяньні Расеі. Мур падкрэсьліў, што Брытанія хацела б мець з Расеяй іншыя, лепшыя адносіны, аднак «гэты выбар зроблены ня намі».
Кіраўнікі MI6, якая займаецца зьнешняй выведкай, даюць інтэрвію вельмі рэдка, а дырэктар службы па-ранейшаму застаецца адзінай асобай, чыя прыналежнасьць да яе афіцыйна прызнаная, нагадвае The Times. Да 1994 году само існаваньне службы афіцыйна не пацьвярджалася на ўрадавым узроўні.
