Адбыўся тэндэр на замену мэдыякуба і бягучага радка на «Менск-Арэне». Фінальны кошт склаў 2,6 млн даляраў. Мадэрнізацыя арэны мусіла стаць адным з этапаў падрыхтоўкі да чэмпіянату сьвету ў хакеі, які зьбіраліся правесьці ў Беларусі і Латвіі, піша «Трыбуна». Мэдыякуб, згодна з патрабаваньнямі тэндэру, павінен мець форму эліпсу.
У тэндэр уваходзілі таксама сьвятладыёдныя экраны, якія знаходзяцца па баках арэны, і будаўніча-мантажныя работы для замены ўсіх названых элемэнтаў. Крыніцай фінансаваньня ў тэндэры пазначылі бюджэт Менску. Тэрмін пастаўкі з 1 студзеня па 30 красавіка 2021 году.
Раней паведамлялася, што ўсяго на мадэрнізацыю «Менск-Арэны» заплянавана выдаткаваць 12 млн даляраў.
18 студзеня Міжнародная фэдэрацыя хакею можа абвесьціць канчатковае рашэньне аб месцы правядзеньня чэмпіянату сьвету 2021 году. Пасьля адмоваў Nivea, Škoda, Tissot і Liqui Moly быць спонсарамі ў выпадку правядзеньня турніру ў Менску, рэзка вырасьлі шанцы на тое, што адбудзецца перанос турніру ў іншыя горад і краіну. Альтэрнатыўнымі месцамі правядзеньня ў эўрапейскай прэсе называлі Данію і Славаччыну, таксама пра гатоўнасьць прыняць не палову, а ўвесь турнір заяўляла Латвія.
