«Голас Амэрыкі» дае агляд вакцынаў ад каранавірусу, якія ўжо ўжываюцца ў розных краінах.
Хто прасунуўся далей?
Амэрыканская фармацэўтычная кампанія Pfizer і яе нямецкі партнэр BioNTech сталі першапраходцамі ў распрацоўцы вакцын ад COVID-19.
18 лістапада яны першыя ў сьвеце апублікавалі поўныя вынікі трэцяй стадыі клінічных выпрабаваньняў. Першай краінай, якая ўхваліла экстранае ўжываньне гэтай вакцыны, стала Вялікая Брытанія 3 сьнежня. За ёй такое самае рашэньне прынялі Канада (9 сьнежня) і ЗША (11 сьнежня). Яе таксама ўхвалілі некалькі іншых краінаў, уключаючы Саудаўскую Арабію і Мэксыку.
Эўрапейскае агенцтва лекавых сродкаў (EMA) ухваліла яе 21 сьнежня.
Хто наступны ўхваліць вакцыну кампаніі Moderna?
Moderna толькі трохі адстала ад Pfizer, калі 30 лістапада апублікавала поўныя дадзеныя трэцяй стадыі клінічных выпрабаваньняў, згодна зь якімі эфэктыўнасьць вакцыны складае 94%. Канада ўхваліла яе 23 сьнежня, а ЕМА, як чакаецца, ухваліць 6 студзеня.
Хто яшчэ ўдзельнічае ў гонцы?
Брытанская кампанія AstraZeneca дамагаецца ўхваленьня сваёй вакцыны ў Вялікай Брытаніі пасьля публікацыі прамежкавых дадзеных аб трэцяй стадыі выпрабаваньняў 23 лістапада. Была паказана эфэктыўнасьць 70%; яна павялічвалася да 90% сярод удзельнікаў выпрабаваньняў, якія спачатку атрымлівалі палову дозы, а затым поўную дозу.
AstraZeneca таксама вядзе перамовы з EMA, якое бесьперапынна аналізуе зьвесткі пра вакцыну.
Амэрыканская кампанія Johnson & Johnson плянуе апублікаваць дадзеныя выпрабаваньняў у студзені 2021 году і разьлічвае атрымаць ухвалу амэрыканскіх уладаў у лютым, калі яе вакцына акажацца эфэктыўнай.
Амэрыканская кампанія Novavax праводзіць выпрабаваньні ў Вялікай Брытаніі, іх вынікі чакаюцца ў першым квартале 2021 году.
Француская кампанія Sanofi і брытанская GlaxoSmithKline 11 сьнежня абвясьцілі, што іх спробы распрацаваць вакцыну аказаліся няўдалымі. Кампаніі растлумачылі, што вакцына выклікала недастатковы імунны адказ у людзей сталага веку на другой стадыі выпрабаваньняў. Новыя выпрабаваньні пачнуцца ў лютым.
Наколькі эфэктыўнымі павінны быць вакцыны?
Сусьветная арганізацыя здароўя (САЗ) лічыць, што ў ідэале вакцына павінна дэманстраваць эфэктыўнасьць не ніжэйшую за 70%. Амэрыканская ўправа кантролю якасьці прадуктаў і лекаў (FDA) патрабуе прынамсі 50%. Гэта азначае, што сярод удзельнікаў выпрабаваньняў, якія атрымлівалі пляцэба, павінна быць як мінімум у два разы больш інфікаваньня ў параўнаньні з тымі, хто атрымліваў сапраўдную вакцыну. ЕМА заявіла, што яно можа пагадзіцца і зь ніжэйшай эфэктыўнасьцю.
Што адбываецца ў Расеі і Кітаі?
Хоць вакцына ад Pfizer была першай, якая стала ўжываецца пасьля публікацыі поўных дадзеных трэцяй стадыі выпрабаваньняў, Расея і Кітай ужо некалькі месяцаў прышчапляюць сваіх грамадзян некалькімі вакцынамі, для якіх трэцяя стадыя выпрабаваньняў яшчэ ня скончылася.
Расея заявіла ў лістападзе, што яе вакцына «Спутник V», распрацаваная Інстытутам імя Гамалеі, паказала эфэктыўнасьць 91,4%, згодна з прамежкавым вынікам трэцяй стадыі. Вакцынацыя «Спутником V» пачалася ў жніўні, ужо прышчапілі больш за 100 тысяч чалавек.
Кітай запусьціў праграму экстранага ўжываньня вакцыны ў ліпені. Паводле стану на сярэдзіну лістапада, у краіне вакцынавалі больш за мільён чалавек. Вакцын выкарыстоўваецца сама меней тры — дзьве ад дзяржаўнай кампаніі China National Biotec Group і адна ад Sinovac Biotech.
