Жанчыну абвінавацілі паводле арт. 364 Крымінальнага кодэксу за гвалт над супрацоўніцамі АМАПу. 17 сьнежня адбылося чацьвёртае пасяджэньне ў справе, ужо з вынясеньнем прысуду, піша Праваабарончы цэнтар «Вясна». У заключным пасяджэньні дапыталі судова-мэдычнага экспэрта, дасьледавалі адміністрацыйную справу і праглядзелі відэаматэрыялы.
Справу разглядаў судзьдзя Руслан Гурын. Абвінавачаньне прадстаўляў пракурор Мікіта Мысьлівец. Пацярпелымі сьледзтва прызнала Дар’ю Бандарчук і Марыю Мазуркевіч з АМАПу.
Мысьлівец запатрабаваў для Марыны Палікарпавай 2,5 года абмежаваньня волі без накіраваньня ў папраўчую ўстанову. Дзяржаўны абвінаваўца таксама прасіў спагнаць з жанчыны суму маральнай шкоды і выдаткі на экспэртызу — 440 рублёў 40 капеек.
Адвакатка Палікарпавай Кацярына Грыцкевіч заявіла, што доказамі папярэдняга і судовага сьледзтваў віна Палікарпавай не даказаная, а яе затрыманьне 9 жніўня незаконнае.
У апошнім слове Марына Палікарпава сказала:
«Часткова прызнаю сваю віну, я эмацыйна абараняла сябе і сваё жыцьцё. Канфлікт паўстаў праз тое, што Бандарчук і Мазуркевіч абразілі мяне ў грубай і нецэнзурнай форме. Прашу суд улічыць усе абставіны: хадайніцтвы і мой 35-гадовы досьвед працы».
Судзьдзя Руслан Гурын прызначыў Марыі Палікарпавай пакараньне ў выглядзе 2 гадоў абмежаваньня волі без накіраваньня ў папраўчую ўстанову — так званай хатняй «хіміі». А таксама пастанавіў спагнаць з асуджанай пэнсіянэркі 3000 рублёў на карысьць пацярпелых Бандарчук і Мазуркевіч, дзяржаўнае мыта, а таксама выдаткі на экспэртызу.
Справа датычыла падзеяў вечара 9 жніўня. Тады фармацэўта Марыну Палікарпаву затрымалі і жорстка пабілі дзьве прадстаўніцы АМАПу — Дар’я Бандарчук і Марыя Мазуркевіч. Але крымінальную справу пачалі менавіта на пацярпелую Палікарпаву.
Дасюль у Беларусі няма ніводнай крымінальнай справы супраць супрацоўнікаў сілавых структураў па фактах забойстваў і катаваньняў дэманстрантаў. А шэраг пратэстоўцаў адправілі за краты з крымінальнымі прысудамі за пратэсты.
