За падсечку міліцыянту віцябляніну далі 4,5 года калёніі

10 сьнежань 2020, 17:23

У Віцебску судзьдзя Натальля Карабліна асудзіла Алега Яфрэменку на чатыры з паловай гады пазбаўленьня волі ў папраўчай калёніі агульнага рэжыму.

Таксама суд задаволіў пазоў пацярпелага міліцыянта, які патрабаваў кампэнсацыі маральнай шкоды ў 1000 рублёў.

Пра гэта паведамляе сайт «Віцебская вясна».

У Віцебску гэта ўжо трэці працэс у крымінальных справах паводле артыкулаў 364 і 366 ( ужываньне гвалту да супрацоўнікаў МУС і службовых асобаў) супраць пратэстоўцаў.

ГЛЯДЗІЦЕ ТАКСАМА:

У Віцебску на 2,5 года асудзілі мужчыну, які бараніў жанчыну ад затрыманьня

У апошнім слове абвінавачаны яшчэ раз прасіў прабачэньня ў пацярпелага, які пасля падсечкі, зробленай Яфрэменкам падчас сутыкненьня пратэстоўцаў зь сілавікамі 13 верасьня, упаў і падрапаў далоні. Яфрэменка таксама папрасіў прабачэньня ў сваёй жонкі, якая засталася адна з малым сынам.

«Віцебская вясна» цытуе словы прысутнага на судзе сябра Яфрэменкі:

«Пацярпелы міліцыянт — малады чалавек без грамадзянскай пазыцыі. Калі выносіўся прысуд і бацьку разлучалі з сынам на чатыры з паловай гады — на ягоных вуснах была ўхмылка. На жаль, такі ў нас тыповы вобраз сучаснага супрацоўніка МУС».