Відэаролік яны даслалі ў рэдакцыю Tut.by. Выкладчыкі Полацкага дзяржаўнага ўнівэрсытэту патрабуюць «свабодных і справядлівых выбараў», «вызваленьня нявінна асуджаных і затрыманых», «пакараньня злачынстваў супраць чалавечнасьці».
«Беларусь – наш агульны дом, і іншага дома мы ня маем. Дзяды і бацькі навучылі нас: у доме няма месца хлусьні, хамству і гвалту. Гэта – не палітыка. Гэта – адвечныя законы чалавечай маралі, безь якіх немагчыма «людзьмі звацца». Славутыя землякі – Эўфрасіньня Полацкая, Францішак Скарына, Ян Баршчэўскі, Вацлаў Ластоўскі, Васіль Быкаў і Рыгор Барадулін – пакінулі нам запавет: жыві ў любові, жыві па праўдзе, жыві сумленна, барані Беларусь ад зла. Нас многа розных – Беларусь адна. Дзеля Радзімы будзем разам», – заяўляюць выкладчыкі і супрацоўнікі Полацкага ўнівэрсытэту.
