У Менску і іншых населеных пунктах Беларусі 14 лістапада праходзяць стыхійныя акцыі супраць палітычных рэпрэсій.
У тэлеграм-каналах зьяўляюцца фота і відэа, на якіх людзі выходзяць на вуліцы з кветкамі, сьвечкамі і плякатамі.
Днём па цэнтры сталіцы ўздоўж праспэкта Незалежнасьці гулялі жанчыны з чырвона-белымі парасонамі і кветкамі ў руках. Да некаторых зь іх пад’яжджалі сілавікі на мікрааўтобусах, размаўлялі зь імі і зьяжджалі.
Сярод людзей, якія гулялі, была заўважаная вядомая актывістка Ніна Багінская з нацыянальным сьцягам.
У раёне станцыі мэтро «Усход» людзі сталі ў ланцуг з кветкамі і плякатамі «Я выходжу».
Невялікі ланцуг людзей з плякатам «Стоп фашызму» стаяў уздоўж МКАД у раёне вёскі Вялікае Сьціклева.
У тэлеграм-каналах людзей запрашалі ўскласьці кветкі ў Менску да мэмарыялаў Аляксандра Тарайкоўскага каля станцыі мэтро «Пушкінская» і Рамана Бандарэнкі на сымбалічнай «плошчы Перамен» на вуліцы Чарвякова.
У мікрараёне Серабранка ў падземным пераходзе арганізаваны мясцовы мэмарыял у гонар загінулых ад дзеяньняў сілавікоў. Каб яго не разбурылі, тут дзяжураць людзі, сюды прыносяць кветкі і сьвечкі.
На сымбалічнай «плошчы Перамен» на вуліцы Чарвякова ў Менску сёньня зьявіліся намёты, у якіх начуюць неабыякавыя людзі — яны ахоўваюць ад зьнішчэньня створаны тут мэмарыял Рамана Бандарэнкі. Другі дзень запар на «плошчы Перамен» зьбіраецца шмат людзей.
У некаторых мікрараёнах сёньня заўважаныя работнікі камунальных службаў, якія прыбіралі народныя мэмарыялы.
Мэмарыялы Рамана Бандарэнкі створаныя таксама ў Баранавічах, Ляхавічах (Берасьцейская вобласьць), Гомелі, Горадні.
На відэа з Наваполацку (Віцебская вобласьць) зьнятая калёна ўдзельнікаў праўладнага аўтапрабегу, якая павольна рухаецца ўздоўж ланцуга людзей з партрэтамі Рамана Бандарэнкі.
Студэнты сёньня распаўсюджвалі па сваіх унівэрсытэтах улёткі з прозьвішчамі затрыманых сакурснікаў і інфармацыяй пра іх.
У МДЛУ прайшлі два мерапрыемствы — пікет у падтрымку ўсіх арыштаваных і памяці забітых актывістаў у Беларусі і акцыя салідарнасьці з затрыманымі студэнтамі.
У сацсетках людзі таксама дзеляцца фатаграфіямі і відэа з удзелам Бандарэнкі.
Жыхары сталічнага мікрараёну Шабаны правялі сёньня футбольны матч, прысьвечаны яго памяці.
