Навукоўцы Беларусі запісалі відэазварот да ўладаў і грамадзкасьці. Ролік пачынаецца выступам акадэміка, доктара філялягічных навук Аляксандра Лукашанца.
«Дзяржава, якая сыстэмна выкарыстоўвае гвалт у дачыненьні да сваіх грамадзянаў, асуджаная на дэградацыю і крах. Сымбалем сёньняшняй улады зьяўляецца чалавек у балаклаве, які б’е бяззбройную жанчыну. Але гэта ня сымбаль Беларусі. Таму беларусы сталі на абарону сваіх правоў і свабодаў», — гаворыцца ў відэазвароце.
Прадстаўнікі навуковай сфэры зьвяртаюцца да сваіх калегаў, якія да гэтага часу ня выказалі сваю пазыцыю адносна таго, што адбываецца ў краіне.
Таксама яны выказваюць падтрымку і салідарнасьць шахтарам, мэдыкам і ўсім тым, хто абараняе свабоду, мараль і гуманізм.
