«Galleria», «Замак» і «Карона» зачыніліся перад пратэстамі
Некалькі гандлёвых цэнтраў у Менску абвясьцілі, што 27 верасьня ня будуць працаваць. Сярод іх «Galleria Minsk», «Замак», што на праспэкце Пераможцаў, «Карона» на вуліцы Кальварыйскай. Яны знаходзяцца ў тых месцах, дзе ў мінулыя нядзелі адбываліся пратэсты і затрыманьні. Некаторыя ўдзельнікі акцый хаваліся ў гэтых гандлёвых цэнтрах ад сілавікоў у балаклавах. Хутчэй за ўсё ня будзе працаваць і падземны гандлёвы цэнтар «Сталіца» на Плошчы незалежнасьці.
Цэнтральныя плошчы ў Менску зноў абгароджаныя і блякаваныя
На плошчы Незалежнасьці ў Менску агароджа і сілы сілавікоў у балаклавах. Яны таксама стаяць каля ўваходаў у падземныя пераходы каля паштамту, праход да плошчы перакрыты. Абгароджаная Кастрычніцкая плошча, пляцоўка каля стэлы «Менск — горад-герой».
Спэцтэхніка сагнаная да Палацу Незалежнасьці, адной з рэзыдэнцый Аляксандра Лукашэнкі.
Музыкаў гурту Best Sound Band, якія выступалі падчас Жаночага маршу, зьмясьцілі ў турму на Акрэсьціна
Падчас Жаночага маршу 26 верасьня ў падземным пераходзе на Плошчы Якуба Коласа ў Менску затрымалі музыкаў кавэр-гурту Best Sound Band. У міліцыю іх даставілі разам са скрыпкай, баянам, бубнам і дзьвюма гітарамі.
Калі частка пратэстоўцаў спусьцілася ў пераход, пяцёрка заграла «Перемен» Віктара Цоя і «Муры» Льюіса Льяка. Людзі віталі маладых музыкаў, падпявалі ім. Але неўзабаве зьявіліся міліцыянты, якія загадалі спыніцца і зьбірацца ў аддзяленьне для «высьвятленьне асобаў».
МУС: за ўчора затрымалі 150, за кратамі пакінулі 116
Як сьцьвярджае МУС, учора ў Беларусі было 10 пратэставых акцыяў, у якіх узялі ўдзел 300 чалавек (недзяржаўныя СМІ налічылі толькі ў Менску дзьве тысячы ўдзельніц «жаночага маршу», дзе МУС налічыла 200 чалавек), а таксама 13 праўладных акцыяў з 40 тысячамі ўдзельнікаў.
Праваабаронцам вядомыя імёны 124 затрыманых учора ў Менску і 12 – у іншых гарадах.
Сьвятлана Ціханоўская зьвярнулася да беларусаў з нагоды 50-га дня мірнага пратэсту
«Гісторыя апошніх месяцаў паказвае, што мы можам усё. З таго моманту, як я вырашыла падаць дакумэнты ў ЦВК, здаецца, прайшла цэлае жыцьцё. Цэлае жыцьцё самых розных падзей і складаных рашэньняў, але галоўнае — гонару за свой народ, гонар быць адной з вас », — гаворыцца ў телеграм-канале «Пул першай».
«Дэмакратыя — гэта ўлада народа. А цэлы народ мацней аднаго чалавека, бо народ змагаецца за свае правы, сваю будучыню і будучыню сваіх дзяцей. Нас мільёны, і мы гатовыя несьці адказнасьць за свае рашэньні. Вось чаму мы пераможам », — адзначыла Сьвятлана Ціханоўская.
Двух чалавек ужо затрымалі ў Менску — каля гандлёвага цэнтру «Галерэя», перадае «Белсат»
Калёна БТР на праспэкце Пераможцаў у Менску
БТР і іншая баявая тэхніка на менскіх вуліцах зьяўляецца не ўпершыню, звычайна яна ахоўвае рэзыдэнцыю Лукашэнкі ў Палацы Незалежнасьці.
Каардынацыйная рада атрымала першыя паўмільёна галасоў у падтрымку сваіх паўнамоцтваў
Збор подпісаў працягваецца. Пра гэта заявіў сябра прэзыдыюму гэтай грамадзянскай плятформы дзеля агульнанацыянальнага дыялёгу Павал Латушка.
Вайсковая тэхніка пад рэзыдэнцыяй Лукашэнкі
Кадры ад чытачоў, ваколіцы Палацу Незалежнасьці ў Менску цяпер, шмат вайскоўцаў і тэхнікі.
Цэнтральныя станцыі мэтро зачынілі
У Менску закрыты цэнтральныя станцыі мэтро «Плошча Леніна», «Плошча Якуба Коласа», «Плошча Перамогі», «Кастрычніцкая», «Няміга» і «Фрунзэнская».
Рэзыдэнцыю Лукашэнкі ў Палацы незалежнасьці ахоўваюць баявыя машыны БПМ і БРДМ, шмат спэцтэхнікі МУС, вадамёты, – відэа перамяшчэньня тэхнікі жыхары Менска выкладваюць у сацыяльныя сеткі.
На Нямізе малалюдна, езьдзяць мікрааўтобусы сілавікоў
У Менску перакрыты праспэкт Пераможцаў, але ў раёне Нямігі па ім нармальна езьдзяць машыны і грамадзкі транспарт. На вуліцы Няміга і ў пачатку праспэкту Пераможцаў людзей мала, магчыма, меней, чым звычайна, бо не працуюць вялікія гандлёвыя цэнтры.
Насупраць Палацу спорту стаяць мікрааўтобусы сілавікоў, такія ж мікрааўтобусы езьдзяць па вуліцах на невялікай хуткасьці.
Кастрычніцкая плошча абгароджаная турнікетамі, калючага дроту, як раней, сёньня тут няма. Ніякіх знакаў, што людзі зьбіраюцца, пакуль няма, перадаюць карэспандэнты Свабоды.
Жывая трансьляцыя тэлеканалу «Настоящее время»
Тэлеканал «Настоящее время» ад 14:00 вядзе трансьляцыю зь беларускіх гарадоў у жывым эфіры.
Больш за паўтара месяца ў Беларусі не сьціхаюць пратэсты пасьля прэзыдэнцкіх выбараў, на якіх, паводле Цэнтарвыбаркаму, шосты раз запар перамог Аляксандар Лукашэнка. 23 верасьня ў рэжыме сакрэтнасьці адбылася таемная інаўгурацыя. У адказ Каардынацыйная рада заявіла пра бестэрміновую акцыю непадпарадкаваньня. На 27 верасьня прызначылі «народную інаўгурацыю» Сьвятланы Ціханоўскай.
Як у Менску прайшоў шматтысячны нядзельны марш. ШМАТ ФОТА
У Менску пачаліся затрыманьні ўдзельнікаў пратэстнай акцыі
Супрацоўнікі праваахоўных органаў у Менску ў нядзелю пачалі затрымліваць удзельнікаў чарговага несанкцыянаванага маршу апазыцыі.
Як перадае «Інтэрфакс», пратэстоўцы зьбіраюцца ў спальных раёнах і калёнамі рухаюцца да цэнтру гораду. Тым часам сілавікі імкнуцца не дапусьціць іх прыходу ў цэнтр. Людзей затрымліваюць па дарозе на акцыю на прылеглых да праспэкту Незалежнасьці вуліцах. Каля 10 чалавек затрымалі на падыходах да праспэкта Машэрава. Людзі накіроўваліся да стэлы «Мінск горад-герой».
У ГУУС Менскага гарвыканкама агенцтву «Інтэрфакс» пацьвердзілі факт затрыманьняў. «Ёсьць некалькі затрыманых у рамках адміністрацыйнага працэсу», – паведаміла афіцыйны прадстаўнік ГУУС Натальля Ганусевіч.
Людзі зьбіраюцца, на Нямізе зьявіліся першыя бела-чырвона-белыя сьцягі
Нягледзячы на кропкавыя затрыманьні, у раёне Нямігі ў Менску пачынаюць зьбірацца людзі, зьявіліся першыя нацыянальныя сьцягі на плячах у пратэстоўцаў, перадае карэспандэт Свабоды. Людзі ў раёне скрыжаваньня вуліцы Нямігі і праспэкта Пераможцаў гуляюць, у калёны не зьбіраюцца. Мікрааўтобусы з сілавікамі езьдзяць, папярэджваюць патэнцыйных удзельнікаў маршу.
Вось як затрымлівалі на скрыжаваньні Машэрава і Пераможцаў у Менску
Жорсткія затрыманьні ў Горадні і Лідзе
У Горадні нечакана пачаліся жорсткія затрыманьні. Схапілі дзясяткі чалавек. Паміж сілавікамі і пратэстоўцаў і завязалася бойка.
А вось так затрымліваюць у Лідзе.
Міліцыя не дае людзям сабрацца ў цэнтры Магілёву
Міліцыя не дае прыхільнікам пераменаў сабрацца на плошчы ля гандлёвага цэнтру «Атрыюм», зь якой традыцыйна пачынаюцца акцыі пратэсту. У тых, хто на лаўках, правяраюць торбы і патрабуюць выдаліць фатаздымкі зь міліцыяй з мабільных тэлефонаў. На мясцовым прыпынку грамадзкага транспарту, закрытым пасьля 14 гадзінаў, стаіць аўтазак. Прылеглыя сквэры патрулююць амапаўцы. У дварах стаяць аўтобусы зь міліцыяй.
Сотні чалавек на праспэкце Пераможцаў у Менску
На праспэкце Пераможцаў сабраліся сотні людзей, яны разгрупаваліся па розных месцах, у тым ліку насупраць Палацу спорту, ля гатэлю “Юбілейны”. Агулам, паводле падлікаў карэспандэнтаў Свабоды, там гуляе некалькі соцень чалавек, актыўных дзеяньняў яны ня робяць, часам пляскаюць у ладкі.
Тым часам сілавікі пільна аглядаюць рэчы людзей на праспэкце Пераможцаў.
Менск. Затрыманьнні пачаліся на праспэкце Пераможцаў
Да гатэля «Юбілейны» пад’ехаў АМАП у чорным і аўтазакі, людзей гоняць далей ад праспэкта, пачаліся затрыманьні, карэспандэнты Свабоды налічылі 5 затрыманых у першыя хвіліны.
У Гомлі людзей адціскаюць зь месцу збору
АМАП адціскае людзей ад сквэру Грамыкі, дзе сёньня зьбіраліся распачаць марш. Кажуць, «дзеяньні людзей незаконныя».