Раніцай 23 верасьня менчукі заўважылі незвычайную актыўнасьць каля менскага Палацу Незалежнасьці: рота ганаровай варты, эскорт з матацыклістаў і сілавікі ў прылеглых раёнах. Прэс-сакратарка Лукашэнкі Натальля Эйсмант адмаўляецца называць дакладную дату інаўгурацыі кіраўніка Беларусі.
«Магу пакуль сказаць толькі, што бліжэй да часу інаўгурацыі мы вам абавязкова паведамім», — сказала РІА Новости Натальля Эйсмант.
Праспэкт Незалежнасьці перакрылі ад МКАД да вуліцы Сьвярдлова, праспэкт Пераможцаў перакрылі ад МКАД да праспэкту Незалежнасьці.
Паводле блогера Антона Матолькі, рух грамадзкага транспарту перакрылі па праспэктам Незалежнасьці і Пераможцаў.
З Астрашыцкага гарадка выехаў картэж Лукашэнкі, паведаміў Антон Матолька а 10:35.
Паводле інфармацыі Радыё Свабода, камэры БТ стаяць на Плошчы Перамогі, паводле Матолькі, камэры БТ стаяць на праспэкце Незалежнасьці каля Нацыянальнай бібліятэкі.
Паводле заканадаўства, інаўгурацыя павінна адбыцца цягам двух месяцаў зь дня выбараў, то бок не пазьней за 9 кастрычніка.
