Меры адносна Беларусі, якія прапануе Эўрапарлямэнт — наколькі яны беспрэцэдэнтныя? Што зь іх увасобіцца ў рашэньні Эўразьвязу? Якой рэакцыі афіцыйнага Менску на меркаваныя санкцыі можна чакаць? Наколькі імаверныя эканамічныя санкцыі адносна Беларусі?
Пра гэта — гутарка аглядальніка Свабоды Юрыя Дракахруста з палітолягам, каардынатарам праграмы «Замежная палітыка Беларусі» Рады міжнародных адносінаў «Менскі дыялёг» Дзянісам Мельянцовым.
- Прапановы Эўрапарлямэнту — гэта прапановы. Рашэньне будзе прымаць Рада ЭЗ, дзе кожная краіна мае права вэта.
- У 2011 годзе парлямэнцкія групы ў ЭП прапаноўвалі вельмі жорсткія меры, рэзалюцыя была больш мяккая, канчатковае рашэньне ЭЗ — яшчэ больш мяккім, хаця там таксама былі санкцыі.
- Рада ЭЗ ня можа проста адмахнуцца ад рэзалюцыі Эўрапарлямэнту.
- Упершыню прапануецца не прызнаваць Лукашэнку прэзыдэнтам, у 2011 годзе такой прапановы не было.
- Пакуль складана сказаць, што азначае непрызнаньне Лукашэнкі прэзыдэнтам дэ юрэ.
- Сытуацыя непадобная на стаўленьне да Вэнэсуэлы, не прапаноўваецца прызнаць Ціханоўскую прэзыдэнтам Беларусі.
- Чаму ЭЗ спрабуе падыходзіць да беларускага пытаньня досыць асьцярожна? Таму што за Беларусьсю стаіць цень Расеі. У эўрапейцаў ёсьць перасьцярогі, што Расея можа нейкім чынам паўплываць на Беларусь і зьнізіць узровень яе сувэрэнітэту.
