Сябра прэзыдыюму Каардынацыйнай рады Вольгу Кавалькову адпусьцілі з ізалятара на лячэньне, паведамілі ў МУС Беларусі карэспандэнту «Интерфакс-Запад».
«Кавалькову адпусьцілі з ЦІП на Акрэсьціна праз стан здароўя», — сказалі ў Міністэрстве ўнутраных спраў.
У канцы жніўня Кавалькову арыштавалі на 10 сутак за арганізацыю несанкцыянаванай акцыі. 3 верасьня, ня выпусьціўшы з-за кратаў, асудзілі яшчэ на 15 сутак.
«Пасьля суду Кавалькову зьмясьцілі зноў у ЦІП. Аднак там яна заявіла пра тое, што ёй патрэбна лячэньне», — сказалі ў МУС.
5 верасьня на прэс-канфэрэнцыі ў Варшаве Вольга Кавалькова сказала, што пакінула Беларусь не па сваёй волі.
«Калі я знаходзілася за кратамі, то да мяне прыйшлі прадстаўнікі ўлады і сказалі, што калі я ня выеду, калі застануся ў краіне, то я вельмі доўга ня выйду з турмы. Яны прыехалі да мяне ў ізалятар, пасадзілі ў сваю машыну, надзелі капюшон, далі маску, паклалі на задняе сядзеньне і вывезьлі з ізалятара».
Паводле Вольгі Кавальковай, яе давезьлі да памежнага пераходу ў Брузгах каля Горадні, там яна праходзіла пашпартны кантроль.
«Яны (прадстаўнікі ўлады. — РС) перавезьлі мае рэчы празь мяжу і на нэўтральнай тэрыторыі прапанавалі мне выклікаць таксоўку. Але ехаў аўтобус на Варшаву, і польскія памежнікі папрасілі польскага кіроўцу, каб ён мяне падвёз».
