У Гомлі міліцыя затрымала раварыста са сьцягам
1 верасьня каля ўнівэрмагу «Гомель» міліцыя затрымала раварыста Дзяніса Гаўрыленку, які праяжджаў побач з крамай зь бел-чырвона-белым сьцягам.
«Мяне затрымліваюць? За што?» — спытаўся ў міліцыянтаў раварыст.
«Не затрымліваем, а дастаўляем у аддзел. Прычыну мы ня ведаем, там вам скажуць», — адказаў адзін зь міліцыянтаў.
Маладога чалавека спрабавалі разам з роварам запхнуць у «УАЗ Патрыёт», але ровар ня ўлез туды. Тады хлопца забралі аднаго, а ровар пакінулі каля ўнівэрмагу. Цяпер яго ахоўваюць чатыры міліцыянты.
Ля Чырвонага касьцёла зноў жаночы «ланцуг салідарнасьці»
Увечары ля Чырвонага касьцёла жанчыны зноў сабраліся ў «ланцуг салідарнасьці». Міліцыя папярэджвае іх праз мэгафон, што акцыя не санкцыянаваная ўладамі, і просіць разысьціся. Жанчыны працягваюць стаяць.
Прэзыдэнт Літвы заклікаў Раду па правах чалавека ААН тэрмінова абмеркаваць становішча з правамі чалавека ў Беларусі
Прэзыдэнт Літвы Гітанас Наўседа зьвярнуўся да Рады па правах чалавека ААН з заклікам у тэрміновым парадку абмеркаваць сытуацыю ў Беларусі. На думку Наўседы, удзельнікам абмеркаваньня неабходна зьвярнуцца да Менску з заклікам устрымлівацца ад ужываньня сілы, забясьпечыць захаваньне ў краіне прынцыпаў міжнароднага права і правоў чалавека і пачаць мірную перадачу ўлады.
«Правядзеньне такой дыскусіі было б своечасовым і важкім крокам», — адзначыў Наўседа.
Ён таксама лічыць, што ААН і міжнародная супольнасьць маглі б больш актыўна падтрымліваць намаганьні краін Балтыі па выбудоўваньні дыялёгу ўладаў Беларусі з прадстаўнікамі грамадзянскай супольнасьці і правядзеньні новых прэзыдэнцкіх выбараў.
Лукашэнка вельмі няўдала патлумачыў, чаму мітрапаліта Кандрусевіча не пусьцілі ў Беларусь, – аглядальнік Свабоды
- Паводле Лукашэнкі, кіраўнік каталіцкай царквы нечакана выехаў для кансультацый у Варшаву і, атрымаўшы пэўныя задачы, вяртаўся ў Беларусь і трапіў у гэты сьпіс неўязных, які агульны ў Беларусі і Расеі. Тлумачэньне вельмі дзіўнае, бо сьпіс неўязных тычыцца толькі замежных грамадзян.
- Лукашэнка намякае, што, магчыма, Кандрусевіч мае два грамадзянствы. Па-першае, прэс-сакратар Каталіцкай царквы ў Беларусі Юры Санько гэта адмаўляе. Кандрусевіч адмовіўся ад расейскага грамадзянства 10 гадоў таму. Але нават калі б у яго было два грамадзянствы, гэта ніяк ня можа быць падставаю для забароны на ўезд у Беларусь.
- Дарэчы, былы кіраўнік БПЦ Павел быў грамадзянінам Расеі, што груба парушала беларускае заканадаўства. Тым ня менш ён сем гадоў кіраваў беларускай царквой, і закон нікога не цікавіў.
Зь іншага боку, Тадэвуш Кандрусевіч — грамадзянін Беларусі. Паводле закону ніхто ня можа забараніць беларускаму грамадзяніну прыехаць на радзіму, піша аглядальнік Свабоды Валер Карбалевіч.
У Горадні ўдзельнікаў студэнцкай акцыі затрымаў АМАП
Каля 20 студэнтаў Горадзенскага дзяржаўнага ўнівэрсытэту прыйшлі да чыгуначнага вакзалу на акцыю незалежнасьці. Яны проста стаялі без сымболікі і лёзунгаў. Хутка да іх прыехаў АМАП, пачаліся затрыманьні. Вядома. што затрыманыя прынамсі 8 чалавек.
У Магілёве журналіста асудзілі на 8 сутак арышту. Ён абвясьціў галадоўку
1 жніўня Ленінскі суд Магілёва асудзіў журналіста інтэрнэт-выданьня «Магілёўскі рэгіён 6tv.by» Аляксандра Сабалеўскага на 8 сутак адміністрацыйнага арышту. На знак пратэсту супраць незаконнага зьняволеньня журналіст абвясьціў галадоўку.
Судзьдзя Вікторыя Палякова прызнала Аляксандра Сабалеўскага вінаватым у парушэньні парадку правядзеньня масавых мерапрыемстваў. Паводле прысуду, ён удзельнічаў 30 жніўня ў несанкцыянаваным шэсьці. Сваёй віны Сабалеўскі не прызнаў. Ён заявіў, што ня ўдзельнічаў у шэсьці, а прысутнічаў на ім як журналіст і вёў зь яго стрым, які трансьляваўся на сайце «Магілёўскі рэгіён 6tv.by». Журналіст настойваў, што не выкрыкваў лёзунгаў і не трымаў транспарантаў.
Аляксандра Сабалеўскага затрымалі 31 жніўня на «Маршы міру і незалежнасьці», калі ён адстаў ад калёны, фіксуючы, як жылец дома скідаў на пратэстоўцаў вазоны з кветкамі. Пра гэта ён паведаміў міліцыянтам. Неўзабаве яго схапілі людзі ў цывільным і занесьлі ў мікрааўтобус. У аўтобусе забралі рэпартэрскі рыштунак. Да суду журналіста двое сутак трымалі ў ізалятары. Цалкам чытайце тут.
Менск: людзі пачынаюць зьбірацца на плошчы Незалежнасьці
Людзі ў Менску пачынаюць зьбірацца на плошчы Незалежнасьці. Як піша Tut.by, там цяпер каля ста чалавек, а Чырвоны касьцёл абкружаюць сілавікі.
Праз 20 хвілінаў каля 10 супрацоўнікаў АМАПу перакрылі ўваход у падземны пераход каля Галоўпаштамту. Каля ўваходу ў гатэль «Менск» таксама да 10 супрацоўнікаў АМАПу.
Праваабаронцы пра вынікі жніўня: забітыя і параненыя, 7500 затрыманых, 41 палітвязень, 0 справаў супраць АМАП
Праваабарончы цэнтар «Вясна» апублікаваў справаздачу аб сытуацыі з правамі чалавека ў Беларусі ў жніўні. Непрапарцыйнае з боку сілавікоў ужываньне фізычнай сілы, спэцсродкаў і зброі (баявой, сьвятлашумавых гранат, гумовых куляў) прывяло да шматлікіх раненьняў удзельнікаў сходаў. Як мінімум 3 удзельнікі пратэстаў загінулі ў выніку стральбы або неаказаньня мэдычнай дапамогі.
Цягам месяца больш за 7500 грамадзян былі затрыманыя за ўдзел у мірных акцыях. Нэгатыўную рэакцыю беларускай і міжнароднай грамадзкасьці выклікалі факты катаваньняў і іншага бесчалавечнага абыходжаньня. «Вясна» задакумэнтавала ня менш за 500 выпадкаў катаваньняў, што сьведчыць пра іх сыстэмнасьць.
На гэты момант у турмах 41 палітвязень, якіх прызнае такімі беларуская праваабарончая супольнасьць. У краіне фактычна ўведзеная цэнзура: заблякаваны доступ да шматлікіх інфармацыйных і праваабарончых сайтаў. Цалкам чытайце тут.
Лідэрку стракаму «Гроднапрамбуду» выклікалі ў Сьледчы камітэт
Супрацоўніцу «Гроднапрамбуду» Юлію Сьліўко выклікалі ў Сьледчы камітэт і дапыталі ў якасьці сьведкі па крымінальным артыкуле 342 (Арганізацыя або падрыхтоўка дзеяньняў, якія груба парушаюць грамадзкі парадак, або ўдзел у іх). Да таго ж яе выклікаюць позвай у РАУС зь невядомай прычыны.
Па некалькіх ранейшых месцах жыхарства Сьліўко прыходзілі невядомыя людзі, прадстаўляліся суседзям праваахоўнікамі, зь якой прычыны – невядома. Сама Юлія расцэньвае такія дзеяньні як запужваньне і ціск за сваю грамадзкую пазыцыю. Раней яна плянавала ўдзельнічаць у забастоўцы на прадпрыемстве, выступала на мітынгу і ў мэдыя. Сьліўко з сынам часова не жыве па сваім сталым месцы жыхарства, бо баіцца перасьледу.
Расейскі палітоляг Калесьнікаў: Лукашэнка цалкам у руках Пуціна, але рэвалюцыя ня спыніцца
Аналітык Маскоўскага цэнтру Карнэгі Андрэй Калесьнікаў лічыць, што Лукашэнку ня ўдасца ўцячы ад «мяккай і паўзучай анэксіі Беларусі». На яго думку, кіраўнік Беларусі можа захаваць сваю ўладу, аддаўшы Беларусь Пуціну.
«З высокай верагоднасьцю можна сьцьвярджаць, што ў абмен на падтрымку Аляксандар Лукашэнка мог паабяцаць паглыбленьне інтэграцыі Беларусі з Расеяй. І менавіта гэтае пытаньне можа стаць галоўным падчас заплянаванага візыту беларускага палітыка ў Маскву», — лічыць аналітык Маскоўскага цэнтру Карнэгі.
Цалкам меркаваньне экспэрта прыводзіць расейскае выданьне Meduza.
Менск: студэнты мэдунівэрсытэту ў ланцугу салідарнасьці на Пятроўшчыне
Спрэчка паміж Ціханоўскай, Бабарыкам і Калесьнікавай аслабляе пратэсты, мяркуе палітычны аглядальнік Свабоды Юры Дракахруст
Справа нават ня ў тым, хто мае рацыю. Калі Сьвятлана Ціханоўская, Марыя Калесьнікава і Вераніка Цапкала аб'ядналіся (ці дэманстравалі адзінства), гэта прывяло і да абʼяднаньня прыхільнікаў Ціханоўскіх, Віктара Бабарыкі і Валера Цапкалы. Зараз былое адзінства пад пытаньнем. Пазыцыя Ціханоўскай: я перамагла, галоўная задача — сыход Лукашэнкі. Пазыцыя штабу Бабарыкі: прыярытэт — стварэньне партыі і канстытуцыйная рэформа.
Для Расеі плян Ціханоўскай непрымальны. Для Захаду ён таксама занадта радыкальны: яна сябе прэзыдэнтам не абвясьціла, яе такім ніхто на Захадзе не прызнае, гавораць пра дыялёг, вынікам якога могуць быць кампрамісныя варыянты.
У той жа час плян каманды Бабарыкі да пэўнай ступені сугучны з прапановамі і Лукашэнкі, і Захаду, і Расеі. Пры гэтым трэба ўлічваць, што зь перадвыбарчых трох штабоў хаця б нейкія кадры засталіся ў Беларусі і на свабодзе пераважна толькі ад штабу Бабарыкі.
Посьпех пляну Ціханоўскай можа забясьпечыць толькі перамога пратэсту, прычым перамога насуперак пазыцыі Расеі і не зусім у рэчышчы пазыцыі Захаду. У той жа час плян штабу Бабарыкі нейкай хуткай перамогі не прадугледжвае па вызначэньні.
Усе гавораць, што брак лідэраў у беларускай рэвалюцыі — вялікая яе слабасьць. Ну, а калі яе ўсё ж наяўныя ці то лідэры, ці то сымбалі ўваходзяць у клінч, уступаюць у публічную спрэчку наконт стратэгічных мэтаў — гэта ўзводзіць слабасьць у квадрат, лічыць палітычны аглядальнік Свабоды Юры Дракахруст
Факты кажуць, што адбываецца перасьлед Касьцёла,— каталіцкі герарх адказаў Лукашэнку
Генэральны вікарый Менска-Магілёўскай архідыяцэзіі біскуп Юры Касабуцкі ў інтэрвію Catholic.by даў ацэнку сытуацыі вакол Касьцёла ў Беларусі.
«Сытуацыя сапраўды ненармальная. Відавочна, што на Касьцёл спрабуюць аказваць ціск, а значыць, адбываецца перасьлед Касьцёла, хоць пра гэта ніхто адкрыта ня кажа. Зрэшты, і ў савецкія часы змаганьня зь верай і Касьцёлам ніхто адкрыта не казаў пра перасьлед, хоць ён быў вельмі жорсткі. Пра тое, што сытуацыя цяпер падобная, кажуць факты», — адзначыў Касабуцкі.
«Усе заявы арцыбіскупа Кандрусевіча знаходзяцца ў адкрытым доступе, кожны іх можа прачытаць і зрабіць высновы. Прадстаўнікі Касьцёла, перадусім біскупы, маюць права і абавязак ня быць абыякавымі да таго, што адбываецца ў грамадзтве, асабліва ў такой сытуацыі, якая сёньня склалася. Гэта ўжо не палітыка, гэта сапраўдны гуманітарны крызіс, які пагражае стаць катастрофай, калі нічога не рабіць», — адзначыў ён. Цалкам чытайце тут.
Берасьцейскага лідэра БСДП ня выпусьцілі з ізалятара пасьля «сутак»
На волю ня выйшаў Ігар Маслоўскі — берасьцейскі абласны кіраўнік БСДП (Грамада). Як піша «Белсат», сёньня яго мусілі вызваліць пасьля 5 дзён арышту, ды сваякам паведамілі, што на яго склалі яшчэ адзін пратакол.
Болтан: Лукашэнка, зьвярнуўшыся па дапамогу да Расеі, адмаўляецца ад улады ў Менску
На думку былога памочніка прэзыдэнта ЗША па нацыянальнай бясьпецы Джона Болтана, цяпер «палітычнае выжываньне» Лукашэнкі залежыць ад Крамля.
«Лукашэнка, магчыма, яшчэ не ўсьведамляе гэтага, але зварот да Масквы па дапамогу, хутчэй за ўсё, азначае, што ён адмаўляецца ад улады ў Менску», — напісаў экс-памочнік прэзыдэнта ЗША Дональда Трампа ў сваім камэнтары, апублікаваным газэтай The Daily Telegraph.
Болтан лічыць, што грамадзяне Беларусі павінны вырашыць, ці сапраўды яны хочуць свабоды і незалежнасьці, і вызначыцца, «ці будзе іх рэвалюцыя празаходняй ці прарасейскай». Пры гэтым экс-памочнік амэрыканскага прэзыдэнта ўпэўнены, што Расея не дапусьціць новай каляровай рэвалюцыі на сваіх межах.
ААН абвясьціла пра 450 выпадкаў катаваньняў пасьля акцый пратэсту ў Беларусі
Экспэрты ААН заявілі, што ім вядома пра 450 задакумэнтаваных выпадкаў катаваньняў і жорсткага абыходжаньня зь людзьмі, пазбаўленымі волі пасьля «спрэчных прэзыдэнцкіх выбараў» 9 жніўня, якія прывялі да масавых пратэстаў і арыштаў.
Большасьць людзей, якія зьніклі бязь вестак, былі знойдзеныя. Але выклікае трывогу той факт, што месцазнаходжаньне і стан здароўя сама меней 6 чалавек, як паведамляецца, невядомыя іх сваякам, гаворыцца ў паведамленьні.
Таксама экспэрты ААН атрымалі паведамленьні пра гвалт у адносінах да жанчын і дзяцей, уключаючы сэксуальны гвалт і згвалтаваньне гумовымі дубінкамі.
Сярод прыкладна 6700 чалавек, затрыманых у апошнія тыдні падчас мірных акцый пратэсту, ёсьць журналісты і мінакі, якія былі адвольна арыштаваныя і пасьпешліва асуджаныя. 29 жніўня ўрад адклікаў акрэдытацыю 17 журналістаў, якія працуюць на замежныя СМІ, адзначаецца ў паведамленьні. Цалкам чытайце тут.
Лінкявічус: Літва дапамагла 60 беларусам, адносна якіх паўстала пагроза бясьпецы, а можа і жыцьцю
Кіраўнік МЗС Літвы Лінас Лінкявічус адхіліў абвінавачваньні з боку міністра замежных спраў Расеі Сяргея Лаўрова, што Літва дзейнічае недэмакратычнымі мэтадамі з кандыдатам ад беларускай апазыцыі Сьвятланай Ціханоўскай, — піша агенцтва Delfi.
«Літва ня ўмешваецца ва ўнутраныя справы іншых краін, у тым ліку Беларусі, бо ў яе на гэта няма права і няма такіх намераў. Адзінае, мы ўмяшаліся, калі дапамаглі тым, у дачыненьні да каго паўстала пагроза бясьпецы, а можа і жыцьцю. Такіх было звыш 60, ня толькі Ціханоўская. Супраць іх на самой справе выкарыстоўваліся гэтыя недэмакратычныя мэтады, пра якія кажа Лаўроў», — дадаў міністар.
Адносна Сьвятланы Ціханоўскай і яе штабу рэальны ўнёсак Літвы — гэта прыстаўленая ахова, адзначыў кіраўнік МЗС. Ва ўсім астатнім яны дзейнічаюць аўтаномна, маюць зносіны з тымі, з кім хочуць кантактаваць.
АМАП разагнаў акцыю ля Ліцэю БДУ
Да акцыі ля Ліцэю БДУ пад'ехаў АМАП. Удзельнікі акцыі кінуліся наўцёкі ад сілавікоў, частка зь іх зайшла ў памяшканьне ліцэю. Відавочцы паведамляюць, што аднаму ўцячы не ўдалося — яго затрымалі, паведамляе Белсат.