Міжнародная арганізацыя Amnesty International патрабуе ад уладаў Беларусі вызваліць Ігара Лосіка і іншых арыштаваных беларускіх блогераў і актывістаў, паведамляе Інтэрфакс.
Amnesty International патрабуе вызваліць арыштаваных у Беларусі блогераў і актывістаў
УЖЫВУЮ Выбары-2020. Як праходзіць прэзыдэнцкая кампанія падчас пандэміі
Міжнародная арганізацыя Amnesty International патрабуе ад уладаў Беларусі вызваліць Ігара Лосіка і іншых арыштаваных беларускіх блогераў і актывістаў, паведамляе Інтэрфакс.
«Беларускія ўлады праводзяць паўнамаштабную зачыстку іншадумцаў, выкарыстоўваючы рэпрэсіўныя законы для задушэньня крытыкі напярэдадні выбараў, на якіх прэзыдэнт Аляксандар Лукашэнка балятуецца на шосты тэрмін запар.
Кандыдаты ад апазыцыі, прыхільнікі і незалежныя СМІ сутыкнуліся з адвольнымі арыштамі, вялікімі штрафамі і турэмным зьняволеньнем. Цяпер тыя, хто актыўна вядуць сацыяльныя сеткі, становяцца мішэньню перасьледаў», — заявіла старэйшая кіраўніца кампаній Amnesty International па Беларусі Аіша Джанг.
Так яна пракамэнтавала паведамленьні, што прынамсі тры выбітныя блогеры — Ігар Лосік, Сяргей Пятрухін і Сяргей Спарыш — былі затрыманыя ў чацьвер.
«Мы ўзрушаныя гэтымі апошнімі арыштамі. Прынамсі яшчэ два папулярныя блогеры, Уладзімер Няронскі і Ўладзімер Цыгановіч, ужо знаходзяцца пад арыштам і ім прад’яўленае абвінавачаньне. Ніхто не павінен быць пакараны за выкарыстаньне інтэрнэту для выражэньня думкі пра ўрад і ягоную палітыку. Улады павінны разумець, што свабода слова — гэта права, а не злачынства», — дадала Джанг.
«Amnesty International заклікае неадкладна і безагаворачна вызваліць усіх блогераў і пакласьці канец задушэньню свабоды выражэньня думак у Беларусі, якое працягваецца», — гаворыцца на сайце арганізацыі.
Amnesty International нагадвае, што за суткі беларускія ўлады арыштавалі паводле сфабрыкаваных абвінавачаньняў
- Ігара Лосіка, аўтара папулярнага тэлеграм-каналу «Беларусь галаўнога мозгу»,
- Сяргея Пятрухіна, адміністратара тэлеграм-каналаў «Народны рэпарцёр» і «Youtube-депутаты»,
- Сяргея Спарыша, сябра ўстаноўчага камітэту партыі «Народная грамада».
- Уладзімеру Цыгановічу ў часе 15 сутак адміністрацыйнага арышту за ўдзел у мірнай дэманстрацыі выставілі абвінавачаньне ў «арганізацыі групавых дзеяньняў, якія груба парушаюць грамадзкі парадак (арт. 342 Крымінальнага кодэксу).
- Уладзімера Няронскага абвінавацілі ў «публічнай зьнявазе прадстаўніка ўлады (арт. 369 КК)
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
