Сёньня раніцай у Сувалках, у паўночна-ўсходняй Польшчы, памёр прафэсар Анджэй Струміла. 93-гадовы польскі мастак зь беларускімі каранямі адчуў сябе ўчора дрэнна. Яго шпіталізавалі, але лекарам не ўдалося яго выратаваць.
Струміла нарадзіўся 23 кастрычніка 1928 году ў Вільні. Дзяцінства правёў у Сьвянцянах над Жэймянай, у Вільні і Лідзе, юнацкі пэрыяд — на наваградзкай зямлі. Скончыў мастацкую вучэльню ў Лодзі і Акадэмію выяўленчых мастацтваў у Кракаве.
У творчай біяграфіі мастака больш за сто індывідуальных выставаў у Токіё і Бэрліне, Маскве і Пэкіне, Нью-Ёрку і Брэмэне. Неаднаразова яго выставы праходзілі і ў Беларусі. Падчас сустрэчы са студэнтамі Беларускай дзяржаўнай акадэміі мастацтваў у 2017 годзе ён падкрэсьліў, што зьяўляецца «грамадзянінам ВКЛ» і лічыць Беларусь сваёй Бацькаўшчынай.
— Беларусь, менская зямля — гэта мая Бацькаўшчына. Мой дзед і мой бацька нарадзіліся ў Менску. Я ў Менску сам бываў, ёсьць у мяне сябры, аўтары, дзеячы культуры. Беларуская мова вельмі блізкая майму сэрцу.
Анджэй Струміла неаднаразова наведваў беларускія імпрэзы ў Польшчы, сябраваў зь дзеячамі культуры зь Беларусі.
Разам з Чэславам Мілашам і Томасам Вэнцлавам Струміла зьяўляецца адным з ініцыятараў выданьня і аўтарам канцэпцыі «Кнігі Вялікага Княства Літоўскага» — тома эсэ (дваццаці аўтараў з Польшчы, Літвы і Беларусі), перакладзеных на літоўскую, беларускую і ангельскую мовы.
Фільм «Сума» («Summa») беларускага рэжысэра Андрэя Куцілы пра Анджэя Струмілу прызнаны найлепшай сярэднемэтражнай стужкай на адным з найпрэстыжнейшых у Эўропе фэстываляў дакумэнтальнага кіно IDFA ў Амстэрдаме.
